Rakhe World Tourism Day ka JTES da ki jingiakop leh reel ban kyntiew ïa ka kam jngohkai pyrthei ha EJHD

Khliehriat Nailur 25: Ka Jaiñtia Tourism and Environment Society mynta ka sngi ka 25 tarik u nailur ka la rakhe ïa ka sngi jngohkai pyrthei lane ka World Tourism Day 2026, ïa ka prokram la pynlong ha hall jong ka Jaiñtia Eastern College ha Khliehriat, ban kyntiew shuh shuh ïa ka kam jngohkai pyrthei, kane ka Society ka la shim ïa ka synjam kaba iahap bha bad ka phangpdeng jong ka jingrakhe Tourism day kaba ong ‘ Degital Agenda and Artificial Intelegence’ namar ka Society ka la pynlong da ka jingiakop shna reels ïa ki san tylli ki kshiad kiba don ha East Jaiñtia Hills District ba kynthup ka kshaid Rynji kaba don ha shnong Cham- Cham, ka kshaid Moopun ba don ha shnong Mutong, ka kshaid Umberleiñ kaba don ha Rangad bad ar tylli ki kshaid ba don ha shnong Lumshlem ba la tip kum ka kshaid Tangnub bad ka kshaid Synrangwatep.
Ka Assistant Direcctor jong ka tnat Tourism jong ka sorkar Meghalaya, ka kong P.Lyngdoh kaba la bat ruh ïa ka kam kum ka Tourism Officer ha East Jaiñtia Hills District ha u snem 2016, haba kren kum ka kongsan ka la kren shibun kiei kiei kiba ïadei bad ka phang ban kyntiew ïa ka kam jngohkai pyrthei bad ka ban jur ïa kawei ka bynta kaba donkam da kaba ong ba ha ri lum Jaiñtia donkam ban don ki Tour Operator khnang ban kyntiew shuh shuh ïa ka kam jngohkai pyrthei namar lada don ki Tour Operator kan kham pynsuk shikatdei eh ïa ki nongwan jngohkai pyrthei kiba kwah ban wah sha ri lum Jaiñtia.
Shuh shuh ka kongsan ka la ai jingmut ba donkam ruh ban don ki website ban pynsaphriang jingtip halor ka jingdon ki jaka kiba itynnad ban dup pynsuk ïa ki nongwan jngohkai pyrthei, kane ka juk degital kan iarap shikatdei eh da kaba ki briew ki lah ban post ha ki facebook, instagram, ha ki youtube kiba dei ki rynsan social-media ban pynsaphriang jingtip ïa ka jingdon ki lum, ki wah, ki kshaid kiba itynnad, kawei ruh ka bynta ba ka kongsan ka la kren kadei kum ka jingaijingmut ïa ki nongshong shnong ba ki dei ban pynpaw kano re kano kaba kham long kyrpang kaba lah ban khring ïa ki nongwan jngohkai pyrthei da kaba ai nuksa ïa ka shnong Mawlynnong kaba ki briew ki tip kum ka shnong kaba khuid tam, ka Mawsynram kum ka jaka kaba jur slap tam bad kiwei kiwei, ha kajuh ka por, ka la kren ruh halor ka phang ba ki nongshong shnong ki dei ban long kiba don ka akor, ka burom ha ka ktein ka thylliej ïa ki nongwan jngohkai pyrthei, ki dei ruh ban don ka jingnang jingtip naduh ka rukom ban pynkhreh ka bam ka dih bad ban pyni ïa ka mynsiem pdiang sngewbha da ka akor ka burom bad da ka jingkmen khnang ba ki nongwan jngohkai pyrthei kin sngew juh sngew jan bad kane kan kytiew ïa ka kam jngohkai pyrthei bad ha kajuh ka por kan kyntiew ruh ïa ka kamai kajih ha shnong ha thaw.
Na ka liang u Programme Co-ordinator, uba la long ruh u Deputy Commissioner ba rim ka East Jaiñtia Hills District ha u snem 2016, u bah M.S.Lhuid, u la ong ba naduh kito ki snem 2017-2018, ka bor district jong ka East Jaiñtia Hills District ka la shim ïa ka synjam ban kyntiew ïa ka kam jngohkai pyrthei, u la kren ruh ïa ka jingitynnad ka mariang ha East Jaiñtia Hills District, kum ka jingitynnad ka shnong Borghat, ka shyiap kaba tip kum ka river beach kaba doha shnong Kwator, ka Waikhyrwi kaba don ka khana pateng, ki krem ki kroh kiba don ha elaka Nongkhlieh ha kaba wat ki briew kiba na bar ka ri ki ju wan ban rungkai sha ki krem kiba don ha Nongkhlieh, u la ong ruh dang ha kine ki khyndiat snem ki briew ki la tip ruh ïa ka jingdon ka kshaid Chympe, ka madan phlang ba heh ba ïar kaba don ha shnong Rangad.
U bah Lhuid, u la kren ruh shaphang kane ka jingiakop pyni reels da kaba ong ba ka jingthmu jong ka Tourism and Environment Society ka long ban kyntiew ïa ka kam jngohkai pyrthei da kaba post lyngba ki reels ba ki briew kin tip ïa kine ki jaka kiba don ha East Jaiñtia Hills District bad mynta ka Society ka shim shwa ïa ki san tylli ki kshaid ban pynsaphriang jingtip, u la bynrap shuh shuh da kaba ong ba ka East Jaiñtia Hills District ka don ka jinglah ha kaba ïadei bad ka kam jngohkai pyrthei ruh namar ka don ki lum, ki wah, ki kshaid, ki krem kiba itynnad bad lada ka kam jngohkai pyrthei ka kiew kane kan ai jingmyntoi ïa ki nongshong shnong ruh kiba don sha kane ka thaiñ.
U la pynsngew ruh ba ha ka 17 tarik u bnai risaw 2026 ka Society kan sa pynlong sa ka jingiakop shon dur bad ïa kane yn leh ha Thlumuwi, West Jaiñtia Hills District.
U bah J.M.Pohsngap, uba la mihkhmat na ka tnat Tourism East Jaiñtia Hills District, u la ong ba ha kawei ka sngi u dewïong un sa lut, u mawshun un lut, ki karkhana kiba don hapoh ka district kin sa khang hynrei ka kam jngohkai pyrthei kam nym kut hynrei kan iai neh pateng la pateng, u la ong ruh ba ki don ki bynta kiba donkam ha ka kam jngohkai pyrthei bad kita ki long ba ki briew ki dei ban tip kumno ban khring ïa ki nong jngohkai pyrthei ban shna ïa ki tiar ki tar kiba itynnad ki ban ai jingmyntoi ïa ki nongshong shnong “Ha East Jaiñtia ki don ki karkhana dewbilat, ki karkhana coke, don u mawshun, don u dewïong, kumta na ka liang ka Society mynta ka kwah ban wanrah sa kane ka karkhana kaba tip kum ka Tourism Industry bad kumta ngi la sdang da kane ka rells competetion bad kaba sngewtynnad ka long ba ka phang pdeng jong kane ka jingrakhe World Tourism Day ruh ka iahap bha bad ka jing jingthmu ka society namar ka Society ka thmu ban wanrah ïa ka kam jngohkai pyrthei lane ka Tourism ha ka degital mode” ong u bah Pohsngap.
U Director jong ka Jaiñtia Eastern College, u Dr phervision Nongtduuba dei uwei na ki riew rangbah uba paw khmat na East Jaiñtia Hills District uba ieid bha ïa ka kam jngohkai pyrthei bad uba ieid ïa ka mariang, uba ju sngewtynnad ban kyntiew ïa ki jaka kiba don hapoh ka district ba kin long ki jaka kiba paw ha ka kam jngohkai pyrthei, haba batai shaphang ka presentation ba la pyni ha kane ka prokram, u la ong ruh ba ka long kaba donkam eh ban ïada ïa ki krem ki kroh, ki um ki wah, ki kshaid, lum, ki khlaw ki btap bad u la batai ruh ïa ki jingdon ki jaka bad itynnad da kaba pyni ïa ki dur khih lyngba ka projector.
La ioh ruh ka jingkren na u Rangbah shnong Mutong, bah Marchy Dkhar ha kaba u la iathuh ïa ka jingwan poi ki nongjngohkai pyrthei hapoh shnong bad la sngewthuh ba ka la don ka jingkiew ha ka jingwan ki nongjngohkai pyrthei kiba wan ban peitkai ïa ka kshaid Moopun bad ka jingkieng maw ba la thaw bad pynwan dur da ka mei mariang.
Ha kane ka prokram la sam ruh ïa ki prize sha ki samla kiba jop ha ka jingiakop pyni reels kiba la pyni ïa ka jingithiang ki kshaid kiba ha East Jaiñtia Hills District ka kshaid Rynji, kshaid Moopun, kshaid Umberleiñ, kshaid Tangnub bad ka kshaid Synrangwatep, kiba la ioh khur ïa ki prize bad ka song Pisa ki kynthup u samla Polmingstar Langstang, uba na ka shnong Sohkymphor, u la rah ïa ka nam lahduh ha ka First Prize, la ai sha u ïa ka syrnot lem bad ka khung pisa T12000 tyngka, u samla Grateful Pohsha ba na shnong Lumshnong u la wan ba ar, la ai sha u ïa ka syrnot lem bad ka pisa T 10000 hajar tyngka bad ka samla Balarishisha Dkhar, ba na ka shnong Chutwakhu Jowai ka la long ba lai, la ai sha ka ïa ka syrnot lem bad ka pisa T 8000 hajar tyngka.
Ha kane ka jingiakop shna reels ki la don haduh khyndai ngut kiba la ïashimbynta.
Kiwei kiwei kiba la ïa don lang ha kane ka prokram ki kynthup ruh u President Jaiñtia Tourism and Environment Society u bah S K.Lato uba la ai ki kyntien pdiang, u bah D. Khong lah, Rangbah shnong Mutong, u bah Marchy Dkhar, Rangbah shnong Lumshken, bah Krin Dkhar, Secretary Shnong Lumshken, bah Yoowest Khaïi, bah K.B.Lakiang bad kiwei kiwei.