Pynrem jur ka EC jong ka Shnong Mawkyrwat: Ha ïew Mawkyrwat pyndonkam ki runar da ka jri siat sim ban siat ïa ki Seng Longkmie

Mawkyrwat, ‘Nailur 24 : Ka Executive Committee jong ka Shnong Mawkyrwat ka la pynrem jur ïa ki runar kiba la thombor bad pynjot pynpra ïa ka dukan jong u Secretary jong ka VDP Mawkyrwat bad kumjuh ruh ïa ki runar kiba la pyndonkam da ka jri ban siat ïa ki dkhot jong ka Seng Longkmie katba ki dang ïaid pahara ïa ka shnong Mawkyrwat ban peit ïa ka suk ka saiñ hapoh ka shnong.
Ha kane ka sngi ki nongïalam shnong Mawkyrwat ki la leit ban ïa kynduh ïa u bah B. Jyrwa, MPS, Superintendent of Police jong ka South West Khasi Hills District ban kyntu ïa ka tnad pulit ba kan shim khia lem bad ban thwet ruh ïa ki runar namar da kaba ki runar ki leh ha kane ka rukom kan buh jingma kaba khraw na ka bynta jong ki, kumno ban wanrah ne ban peit ïa ka shongsuk shongsaiñ jong ka shnong.
Haba ai jingkren sha ki lad pathai khubor, u bah Newtonroy Lyngkhoi uba dei u Secretary jong ka shnong Mawkyrwat u la ong ba naduh ba ki Seng Longkmie bad ki VDP ki la shimkhia ban peit ïa ka suk ka saiñ hapoh ka shnong ka la don shibun ka jingkylla ba ka shongsuk shongsaiñ ka la kylla bad ka la kham shngaiñ haba ïaid ba ïeng ki longkmie, ki khynnah ha ïew Mawkyrwat kumjuh ruh hapoh shnong.
Namarkata, ka shnong ka la kyntu ruh ïa ki runar ba ki dei ban wan pyndem noh kloi kloi ha khmat jong ka aiñ lada kim wan pyndem noh ka shnong bad ki bor jong ka aiñ kin pynjur ïa ka thwet ban kem ïa ki.