Ai khublei kitbok kitrwiang ka MLA ïa ki samla pule ka JEC-Khliehriat ha ka Graduation Day 2026

Khliehriat nailur 24:- Ka MLA Sutnga Saipung Constituency, ka kong Santa Mary Shylla ka la long kum ka kongsan ha ka prokram Graduation Day 2026 jong ka Jaiñtia Eastern College Khliehriat ba la pynlong mynta ka sngi ka 24 tarik u nailur 2026 bad haba kren kum ka kongsan ka la kyntu ïa ki samla pule ba ki dei ban long kiba treishitom, kiba don ïa ka thong, ka la ai ruh ka jingkhublei kitbok kitrwaing ïa ki samla pule kiba la shah pynkup burom mynta ka sngi ha kane ka Graduation Day.
Haba kren sha ki samla pule ka kongsan ka la ong “ka jingim ka long kaba dap tang ki jingeh bad jingialeh, baroh na ngi ngin nym lah ban poi sha ka thong tang hapoh ki por ba khyndiat hynrei donkam ban treishitom, ban ïaishah ban poi sha ka thong, nga kyrmen ba phi ïaid shakhmat ha ki jinglong jingman ba itynnad bad wanphai biang pat sha la ka district ryngkat bad ka burom” bad ka la bynrap ruh da kaba ong ba na ka liang ka sorkar ruh ka treishitom ban kyntiew ïa ki samla bad thaw bun ki lad ki lynti ha kiba bun ki bynta ban kyntiew ïa ki samla,kumjuh ruh na ka liang jong ka kum ka MLA bad na ka sorkar ruh ki long la kloi ban kyrshan lang lada ha kino kino ki bynta ban kyntiew ïa ki samla. Ha kajuh ka por, ka la ai ka jingkhublei ba kyrpang ïa ki nonghikai bad ïa ki kmie ki kpa kiba la treishitom lang ban kyntiew ïa ki khynnah ha ka pule puthi bad ong ruh ba ka jingnang jingstad ka long kaba donkam bad ka dei ruh ka bynta kaba hakhmat eh.
Na ka liang u Deputy General Manager jong ka company Dalmia Thangskai, u Mrinal Baruah, uba la shah khot sngewbha sha kane ka prokram Grdauation Day ha Jaiñtia Eastern College Khliehriat, u la pynsngew bad iathuh ïa ka jingnohsyniang ka company Dalmia sha ka Jaiñtia Eastern College Khliehriat, ha kaba ka company ha ryngkat ka jingiatreilang bad u Director jong ka Jaiñtia Eastern College, u Dr P.Nongtdu lem bad ki bor pyniaid college ka la lah ban thaw ïa kawei ka shnat ai jinghikai kaba la tip kum ka DIKSHA kaba ai jinghikai ïa ki samla pule ha ka kam ban pynbhabriew lane beautician namar ynda ki la dep shah hikai ki samla pule ki lah ban thaw ïa ki lad kamai da kaba plie ïa ki Beauty Parlour.U Mrina Baruah u la kren shibun kiei kiei kiba ïadei bad kane ka project DIKSHA bad ha kajuh ka por u la ai khublei kitbok kitrwiang kyllum lang ïa baroh ki samla pule kiba la shah pynkupburom ha kane ka Graduation Day ba kynthup lang ruh ki samla kiba la pyndep ïa ka jingshah hikai ha na ka shlem ai jinghikai kaba don ha Jaiñtia Easern College ka DIKSHA Beauty Care, kum ka jingpynshlur bad jingai mynsiem ïa ki samla pule u la pashat da ki jingiathuhkhana kiba donjingmut jong ki briew kiba poi sha ka thong ha ki kam ki jam ba ki thmu.
U la iathuh ruh ba ka company Dalmia ka la leh ruh bun ki kam pynroi ban kyntiew ïa ka imlang ka sahlang ha kiba bun ki jaka ka dei ruh ka company kaba heh kaba ieng ha ka kyrdan kaba saw (4th) ha ka ri napdeng ki company pynmih dewbilat, u la ai mynsiem shuh shuh ïa ki samla pule da kaba ong ba donkam ban don ruh ka jingsngew skhem ban poi sha ka thong.
Ha kane ka prokram, ka kongsan ka kong Santa Mary Shylla ka la pyllait paidbah ruh ïa kawei ka kot “Jaiñtia Hills-The Story of Coal in Meghlaya” ba la thoh bad pynbit pynbiang da ka Dr R.Merika Nongtdu.
Shuh shuh ruh ha kane ka sngi la pynkupburom ruh ïa ki samla pule kiba la leh bha ha ki kam ne ki bynta bapher bapher kum ha ki kam jong ka NSS, ka NCC, red Ribon Club, ha ki kam ialehkai Sports bad kiwei kiwei.
La pynkupburom ïa kiba la ioh khur ïa ki khusnam best NCC Cadets ba kynthup u samla Thiar Phawa, ka samla WansakaniNongtdu, ka ban sa leit ruh ban mihkhmat na ka jylla Meghalaya sha ka ri Philippines ha ka Youth Exchange Programme, katba ïa u samla Sunidonhi Kanai (SD) bad ka samla RimanishaBamon (SW) la pynkup burom namar ba ki ioh khur ïa ka Best NCC Volunteer, u JudicrousPachiang u ioh topper of Class XII Commerce, MBOSE Examination 2026 bad ka Myllingmika Pala , topper of Class XII Arts, MBOSE Examination 2026.
Ka jingpynkupburom ka long ruh ïa ki samla kiba la pyndep ïa ka kyrdan Bachelor of Arts ha ka Economics, Education, Political Science, Commerce, Khasi bad kiwei kiwei ki subject.
Kiba la ïa don ryngkat ha kane ka prokram ki kynthup ka Principal Jaiñtia Eastern College Khliehriat, ka Dr R.Merika Nongtdu, Director jong ka college, u Dr Phervision Nongtdu, u Adviser, Pastor F.S.Rymbai, ki riew pawkhmat na ka thaiñ kiba la shah khot sngewbha, ki kmie ki kpa jong ki samla pule, ki nonghikai ka college lem bad ki samla pule jong ka college.