Bym jubab ïa ka showcause notice, Sospon ka UDP ïa 3 MLA hadien ka jingpynïasoh sha BJP

Shillong, Nailur 23: Ka UDP ka la sospon ïa ki lai ngut ki MLA jong ka party hadien ba kim shym la jubab ïa ka show-cause notice kaba ka party ka la phah sha ki halor ka jingpynïasoh jong ki sha ka BJP.
Ka rai ban sospon ïa ki la shim da ka State Parliamentary Board jong ka UDP ha ka jingïalang kaba la long ha ka sngi Balang, hapoh ka jingïalam jong u President ka party, u Bah Metbah Lyngdoh.
Haba kren bad ki lad pathai khubor, u Bah Metbah u la ong ba ka party ka la ai por ïa kitei ki lai ngut ki MLA haduh ka sngi Balang ban wan mih hi ha khmat ka State Parliamentary Board ban ai jingpynshai, ne ban phah ïa ka jubab da ka jingthoh.
Hynrei, u la ong ba ym don uwei ruh napdeng kitei ki lai ngut uba la jubab ïa ka notice.
“Kumta, ka party, da kawei ka sur, ka la shim ïa ka rai ban sospon ïa kitei ki lai ngut, haduh ban da pynbna pat da kawei pat ka rai,” u la ong.
La ïathuh ruh ba kine ki lai ngut ki kynthup ïa u MLA ki dei u Bah Olan Sing Suin, MLA ka Mawsynram, nangta u Bah Kyrmen Shylla ba dei u MLA ka Khliehriat, bad kumjuh u Bah Mathew Beyondstar Kurbah, MLA ka Mawphlang.
Na ka liang u President ka party u la ong ba ka hukum ban sospon ïa ki la pyntip da ka jingthoh, bad ka party kan sa shim ïa ka sienjam kaba bud halor kane ka mat bad kan pynbna ïa ka rai ha ka por kaba dei.