ïaroh u Rijiju ïa ki 8 ngut ki MLA ka UDP ba pynïasoh BJP yn nang khlaiñ ka Sorkar MDA

Shillong, Nailur 23 : U Myntri ka Sorkar Pdeng u Kiren Rijiju ha ka sngi Balang ula shim ïa ka jingwan pynïasoh ki 8 ngut ki MLA ka UDP sha ka BJP kum ka por kaba batai shai na ka bynta ka Meghalaya bad ka thaiñ Shatei Lam Mihngi, haba pynpaw ba kane kan nang pynkhlaiñ shuh shuh ïa ka Sorkar MDA ba ïalam da u Conrad K Sangma.
Haba pdiang ïa ki MLA ha ka jingïalang ha Headquarter ka BJP ha New Delhi, u Rijiju ula ong ba ka jingdon ki MLA jong ka BJP ka la kiew sha ka 10 ngut ha Meghalaya bad kan pynthikna ïa ka jingïatreilang kaba kham bha shuh shuh bad ka kynhun synrop ba synshar ïa ka Jylla.
“Naduh mynta ka Sorkar ba ïalam da u Conrad K Sangma ha Meghalaya, kaba dei ka Sorkar MDA, kan nang khlaiñ shuh shuh namar ka jingdon ki MLA ka BJP ka la kiew. Ngin nang don ïa ka jingïatreilang ba kham bha, kham sngewthuh jingmut bad pynsted ïa ki jingpyrshang jong ngi ban pynroi ïa ka Meghalaya” ula ong.
U Rijiju ula pynpaw ba u donbok eh ban long shi bynta jong kane ka jingïalang kum u nongïalam na ka thaiñ Shatei Lam Mihngi bad u Myntri ha ka Sorkar u Modi.
“Kum u briew na ka thaiñ Shatei Lam Mihngi bad kum u Myntri ha ka kynhun Myntri u Modi, Nga sngew donbok bad sngew kmen ruh ban ïadonlang ha kane ka jingwan ïasoh ki MLA ka Meghalaya. Ka long kaba kongsan bha na ka bynta ka histori saiñ pyrthei jong ka thaiñ Shatei Lam Mihngi, ka lynti ïaid ka saiñ pyrthei ka Meghalaya”ula ong.
“Nga ai khublei ïa baroh ki 8 ngut ki MLA namar ka jingnud ban shim ïa kane ka rai kaba kongsan ban wan ïasoh sha ka BJP” ula ong. U Myntri u ong ba kine ki MLA ki la wan ïasoh namar ka jingkylla jong ka thaiñ Shatei Lam Mihngi hapoh ka jingïalam u Myntri Rangbah Duh u Narendra Modi ha kine ki 12 snem bala leit noh.
“Baroh 8 ngut ki MLA ba pawnam na Meghalaya ki la ïasoh sha ka BJP. Ka dei ka jingjia ba kongsan bha ha ka saiñ pyrthei ym tang jong ka thaiñ Shatei Lam Mihngi hynrei jong ka Ri. Nga pdiang naduh ka mynsiem ïa baroh kine ki paralok, ki MLA ka Meghalaya” ong u Rijiju.
Shuh shuh une u Nongialam ka BJP bad Myntri ka Sorkar Pdeng ula ong ba ka thaiñ Shatei Lam Mihngi kala mad ïa ka jingshah lehbeiñ hapoh ka jingïalam ka Sorkar Congress, kaba la leh bym suidñiew ïa ka thaiñ namar ka jingbym don bun ngut ki MP bad MLA.
Haba pdiang sngewbha ïa ki 8 ngut ki MLA ka UDP na Meghalaya sha ka BJP ha New Delhi, u Rijiju ula ong ba u Myntri Rangbahduh ka ri u Narendra Modi ula pynkylla ïa ka politik jong ka thaiñ shatei lammihngi da kaba kdup ïa ka thaiñ.
“U Myntri Rangbahduh ka ri ula pynkylla ïa ka politik. Ngan ai ha phi ïa kawei ka nuksa. Ha ki por mynshwa, ka Congress ka ju leh ïa ka thaiñ North East kum ka jaka kaba don sha kyndong kynshrot” ong u Rijiju.
“Ki jylla ha ka thaiñ North East ki dei kiba rit, ki don ki jylla kiba don tang 2 ngut ki MP, don ki jylla kiba don tang uwei u MP lait noh ka Assam kaba don 14 ngut ki MP. Ngi lah mad ïa ka jingshah ñiewbeiñ ha ka por jong ka jingsynshar ka Congress” ula ong.
Ula kam ba ha ka jingsynshar ka Congress, ki Myntri Rangbah ka thaiñ North East ki la mad ïa ka jingshah pynkhlemraiñ.
“Haba pynkynmaw ïa ki por jong ka Congress, ki Myntri Rangbah ka thaiñ North East kila mad ïa ka jingshah pynkhlemraiñ. La bthah ïa ki hakhmat jong ki jingïalang paidbah ba ki dei ban kren tang khyndiat namar ba ki don tang khyndiat ngut ki MP bad ki MLA” ong u Rijiju.
“Bun ki Myntri Rangbah hakhmat jong ki jingïalang paidbah jong ka Congress, ki la shah ong, ba ki dei ban kren lyngkot namar ba ki don duna ïa ki MP bad MLA. Kane ka dei ka jingshah pynkhklemraiñ, ka Congress kala shim ba ka thaiñ North East ka dei tang ka jylla bad ka thaiñ ka bym don jingmut ei ei ha ka politik” ula ong.
U Rijiju ula ong, ba u Myntri Rangbahduh ka ri u Modi, ula leh mar khongpong ha kaba um shym la kheiñ ei ei ïa u number.
“Ha kawei pat ka liang, u Myntri Rangbahduh ka ri u Narendra Modi, um shym la kheiñ ei ei ïa u number. U Myntri Rangbahduh ka ri ula kdup da ka jingjan ïa ka thaiñ North East ha ka mynsiem ka jongu” ula ong.
Haba pynshai halor ka PM Outreach, ula ong, “U Myntri Rangbahduh ka ri ula wan jngoh palat ïa ka 80 sien. Ngam kren halor ka jingwan ïalap elekshon. Palat ïa ka 80 sien kum u Myntri Rangbahduh ka ri na ka bynta ki kam pynroi bad ban pynïasoh bad ka thaiñ North East. U Myntri Rangbahduh ka ri ula bthah ïa ki Myntri ka Sorkar Pdeng ba ki dei ban leit jngoh ïa ka thaiñ shatei lammihngi shisien ha ka 3 bnai bad 15 ngut ki Myntri ki dei ban poi man la ka bnai, ka thaiñ North East ka ju long ka jaka leit ïa ki myntri sorkar bad kane kan ïai bteng”.
“Ka politik baroh kawei ka la kylla hapoh ka jingïalam u Modi bad mynta ka thaiñ North East kam dei shuh kaba la shah ieh ne shah kyntait bad dei halor kane ba 8 ngut ki MLA kila wan ban rung sha ka BJP. Ka BJP ka dei ka longïing kaba heh. Ngi dei ka seng saiñ pyrthei kaba heh tam ha ka pyrthei”.