Shillong, Nailur 23 : Hadien ka jingtreikam ba 45 snem na ka ïing ba shipor, ka Meghalaya Board of School Education (MBoSE) Shillong Regional Office kan sa ïoh noh ïa la ka jong ka Ophis ba pura.
U Myntri Rangbah ka Jylla Conrad K Sangma ha ka sngi Balang, ula buh ïa u maw nongrim ban tei ïa ka Regional Office ba thymmai ha phyllaw ka Tnad Education ha Laitumkhrah, kaba pyni ïa ka jingpynbun ïa ki jingtei kiba ïadei bad ka pule puthi hapoh ka Jylla.
U Conrad ula ong ba kane ka Ophis thymmai kan pynkhlaiñ ïa ka jingtreikam jong ka MBoSE bad kan ai ïa ka jingkyrshan kaba khraw ïa ka kam pule puthi jong ka Jylla. “Ka jingpynleit jingmut jong ngi ha ka kam pule puthi ka ïaid palat ïa ka jingtei” ong u Myntri Rangbah haba kdew ïa ki sien jam ba la shim da ka Sorkar ba kynthup ïa ka Mission Education, Mission School, CM IMPACT, digital learning bad kiwei kiwei ki kam ki ban pynbha ïa ki result ha ki eksamin bapher bapher.
Ula ong ba ka Sorkar kala shim ia ka lynti jam kawei hadien kawei ban pynkhlaiñ ïa ka pule puthi bad plie ïa ki lad ba kham bha na ka bynta ki khynnah pule.
Kane ka Regional Office ba thymmai la khmih lynti ba kan pynkhlaiñ ïa ka jingtreikam ka MBoSE ha Shillong bad ai ïa ka jaka treikam ba long laitlid hadien phew snem ba treikam na ka ïing ba shipor.
