Shillong, Nailur 22: Ki nongtrei shet ja sngi ne ki Mid Day Meal Cooks cum Helpers kiba don ha kylleng ki skul jong ka Jylla, hapoh ka lama jong ka Union of Cook cum Helpers PM POSHAN Meghalaya bad ka All Jaiñtia Midday Meal Worker Association ha ka sngi baar kila ïamih ban shong kyllaiñ mynngor ha Khyndailad jong ka nongbah Shillong ban dawa na u Myntri Rangbah duh ka Ri ban pynneh ïa kane ka skhim PM-POSHAN bad ban pynkiew ïa ka bai nong kum ka jingai sngewbha (honorarium) ïa ki.
Ïa kane ka jingshong kyllaiñ myngngor ba jai jai la pynlong ha kylleng ki District jong ka jylla mynta ka sngi, kynthup sha ki bynta ka rilum Garo ka ban long ha ka 25 tarik u Nailur, 2026 ban dawa jur ïa ka sorkar ban pynurlong ïa kane ka jingdawa kum ki nongtrei shet ja sngi kiba ju im na kane ka kam.
Haba kren sha ki lad pathai khubor na ka liang ka President ka kong Gina Nengnong ka la ïathuh ba kane ka jingïakhih kan iaid beit naba ka long kaba shong hok khnang ba ka sorkar kan lah ban pynurlong ia ki jingdawa jong ki.
Shuh shuh ka la ong ba kane ka jingshong kyllaiñ myngngor ka long shi bynta na ka jingïakhih sangeh shet jong ki naduh u 1 tarik u Nailur ka ban bteng haduh ka 30 tarik u Nailur, 2026.
“Mynta ka jingïakhih sangeh shet ja jong ki kala jam sha ka 22 sngi, da kaba kyntu ïa u Myntri Rangbah duh ka Ri bad ki Myntri ka sorkar India ban kin bteng ïa kane ka skim kaba la kut ka jingtreikam naduh 31 Lber 2026, hynrei na ka liang ka Ministry of Finance naduh u bnai April-September kala bteng kum ka (temporary extension) ba shipor,” ka la ong.
Shuh shuh ka la ong ha ka jinglap jong ki kum ki nongtrei shet ja sngi, kane ka skim kala ïarap shibun eh, kumta ki dawa ba kan bteng biang ïa kane ka skhim, ha ka juh ka por ka la dei ban pynkiew ïa ka jingai sngewbha (honorarium) na ka T. 900 tyngka sha ka T. .9000 hajar tyngka ha ka shibnai na ka sorkar kmie.
Ka la ong kiba bun na ki nongtrei ïa kane ka kam naduh Mizoram, Nagaland, Manipur, Assam ruh ki don ka juh ka jingsngew ban dawa pynneh ïa kane ka skim bad ban pynkiew ïa ka honorarium, u kyrmen skhem ba u Myntri Rangbah duh ka ri un pyntreikam ïa kane ka jingdawa.
Kala pyntip ruh na ka liang ka sorkar jylla ka la dawa na ka sorkar kmie ban pynkiew ïa kane ka jingai sngewbha, lyngba kane ka jingïakhih u kyrmen ka sorkar ka pyntreikam ban bteng ïa ka skim khnang ba ki nongtrei bylla shet ja sngi ha ki skul kiba don kylleng ka Ri kin ïoh kam bad ki khynnah ruh ki poi sha ki skul da ka jingkmen.
