Nongpoh, Naitung 29: Ban ai mynsiem bad ban pynshlur ïa ki samla pule ka dong Ri-Bhoi kiba la pass bha ha ka SSLC bad HSSLC examination 2022, ka Ri Bhoi Youth Federation (RBYF) mynta ka sngi ka la pynkup burom bad ai da ki khusnam sha kito ki samla kiba dei na Ri Bhoi kiba la pass bha ha katei ka examination.
Ïa kane ka jingpynkup burom bad sam khusnam la pynlong ha Parish Hall, Nongpoh ha kaba la wan ban shim bynta da u MLA ka Nongpoh, u Bah Mayral Born Syiem kum u kongsan bad la sakhi lang ruh da ka jingdong lang u Bah B Diengngan DSP Crime, Vice President ka FKJGP, Sengkmie, u Bah Kitboklang Nongphlang, u Samla Wanstep Dkhar, dkhot ka KSU Sengkmie, ki President barim ka RBYF ba kynthup ïa u Bah F.M Mawphniang, U Bah B.B Makdoh, u Bah Rocky Kylla, u Fr. Peter Syiemlieh, Parish Priest ka Nongpoh, u Vice President ka RBYF, u Bah L.K Sawkmie ryngkat kiwei kiwei ki nongïalam ka RBYF bad ki dkhot na ki Circle bad ki Unit.
La pynphuh pynphieng ruh ha kane ka sngi ba ka RBYF ka pynkup burom bad sam khusnam sha kitei ki samla pule da ka jingdon lang ki 15 ngut ki samla ba pass bha ha ka HSSLC bad 10 ngut na ka SSLC ryngkat ki kmie ki kpa bad ki nonghikai jong kitei ki khynnah skul.
Na ka liang ka RBYF ha kane ka sngi nalor ka khusnam pisa ba ka la ïarap sha kitei ki samla pule ka la sam ruh ïa ki synod sah jingkynmaw ban ithuh ba ki dei ki samla kiba la la wan shakhmat ha Ri-Bhoi ha ka jingpule lyngba ka jingpass bha jong ki ha kitei ki examination.
Kumba la ïathuh da u President ba rangbah ka RBYF, u Bah Bipul Thangkhiew, ka seng RBYF ka la sdang ban sam khusnam sha ki samla pule naduh u snem 2005 bad ka thong ka long ban ai mynsiem ïa ki samla pule ka Ri-Bhoi ba kin dang kiew shaphrang ha ki jingpule. U la ïathuh ruh ba ka RBYF ka kyrshan ruh da ka pisa na kaba long T. 500 shibnai naka bynta 3 snem ïa kito kiba rung ha ka thup ba shiphew bad ka thup ba arphew jong ka SSLC bad HSSLC examination kum ka baibam haka jingpule jong ki.
U la ong ruh ba ka RBYF kan dang bteng ban leh ïa kane ka kam ym tang ban pynshlur ïa kitei ki samla pule kiba la pass bha ha ka examination, hynrei lyngba ka jingdon kum kine ki jingai mynsiem kan long ruh ka jingai mynsiem na ka bynta kiwei ki khun samla kiba dang don ha ka jingpule ba kum ka RBYF ka don ïa ka thong ban pynmih shibun ki riew shlur bad ki riew khraw kiba ai pat ka jingshakri na ka bynta ki paidbah ka Ri Bhoi bad ruh ban kyntiew ïa ka bha ka miat bad ka roi ka par jong ka dong Ri Bhoi hadien ba ki la biang kam biang jam bad poi sha ki kyrdan kiba shaneng.
Na ka liang u Bah Mayral Born Syiem, MLA ka Nongpoh haba kren kum u kongsan bad kynthup ruh kitei kiwei kiwei ki nongïalam ki la ai ka jingïaroh ïa ka RBYF kaba la shim ïa kane ka bynta ban leh burom ïa kitei ki samla ba pas bha bad ki khmih lynti ruh da kane ka jingsam khusnam sha ki khun samla kan dang ai mynsiem ïa ki ba kin dang lah ban leh bha ha ki jingpule khnang ba kin mih kita ki khun samla kiba don pat ka jingkitkhlieh ïa ka imlang ka sahlang hadien ba ki la longheh longhaiñ.