Agar Malwa, Nailur 19 : Phra ngut ki briew, kynthup ïa hynñiew ngut ki dkhot jong kawei ka longïing na Odisha, ki la khlad hadien ba ka kali ba ki shong ka la hap sha ka nala ha ka distrik Agar Malwa jong ka Madhya Pradesh ha step jong ka Sngi Saitjaiñ.
Ka khubor sorkar ka ong ba uwei na kiba khlad lang ha kane ka jingjïa dei u nongñiah kali, uba dei na Madhya Pradesh.
Ka jingjia ka la jia hajan ka temple Bagulamukhi ha ka sor Nalkheda, kaba jngai kumba 30 km na ka district headquarter, ong u Shashi Upadhyay, uba long u Officer-in-Charge jong ka Nalkheda Police Station.
U la ong ba kane ka kali kaba kit ïa ki nongleit mane blei na Odisha ka la hap sha ka nala kaba la shlei da ka um slap. Na kiba don lang ha ka kali ki kynthup ïa lai ngut ki khynnah bad ar ngut ki kynthei, kiba la khlad.
U Myntri Rangbah jong ka Odisha, u Mohan Charan Majhi, ha ka jingthoh jong u ha X, u la ong: “Nga sngewsih shisha halor ka jingkhlad jong ki nongwan jngohkai na Odisha ha ka jingjia aksiden ha Madhya Pradesh. Nga phah ïa ki jingsngewlem kiba khraw sha ki longïing jong kiba khlad. To ki mynsiem jong kiba khlad kin ïoh ïa ka jingshongthait.”
U Myntri Rangbah u la bthah ïa ki ophisar ban ïatreilang bad ka sorkar Madhya Pradesh bad ka bor synshar distrik ban pynsted ïa ki lad ki lynti baroh bad ban pynthikna ba ki met jong kiba khlad kin poi biang sha Odisha da ka burom kaba dei.
Ki briew kiba khlad ha kane ka jingjia ki long Sibaprasad Behera (43), Rojalin Behera (34), Ritarani Behera (36), Gyanendra Behera (40), Sai Swarna Prava Behera (6), Krishna Rajbir (13), bad Sai Swastik Behera (10) pynbna ki heh sorkar ha Bhubaneswar. Haduh mynta, ym pat lah ban tip ïa ka kyrteng jong u nongñiah kali.
Katkum ka jingbthah jong u Myntri Rangbah, ka sorkar jylla ka dang ïakren bad ïatreilang bha bad ka sorkar Madhya Pradesh, la ong u Pritish Panda, Officer on Special Duty (OSD) jong ka Directorate of Odisha Paribar.
“Ka Chief Secretary jong ngi, ka Anu Garg, ka la dep ïakren bad ka para Chief Secretary jong ka ha MP, bad ki jingpyrshang ki dang ïaid shakhmat ban pynpoi ïa ki met jong ki nongwan jngohkai na Odisha,” ong u Panda.
