Ka tnat Bording ka la long thik kum ka lieng ka ban sa ngam noh; ong u Bah Renikton L. Tongkhar

Mawkyrwat, ‘Naitung, 29: U Myntri ka tnad Umbam Umdih jong ka Jylla Meghalaya, bah Renikton Lyngdoh Tongkhar uba dei ruh u nongmihkhmat jong ka Mawkyrwat Constituency ha ka jingkren kum u kongsan u la ong, “halor ka jingduhnong jong ka tnat bording kaba long thik kum ka lieng ka ban sa ngam noh”, ha ka jingkren jong u ha ka jingïalang ban rakhe ïa ka Ujjwal Bharat Ujjwal Bhavishya @ 2047 ha Rangblang Sohsynniang, South West Khasi Hills District.
Namarkata, u la kyntu ïa ki paidbah ban ïaleh ban tan bad pynkhie khlieh biang ïa kane ka tnat da kaba kin siew thikna ha ka por kaba biang ïa kaei kaba ki la dep ban pyndonkam bad u khmih lynti ruh ba shen ka jylla kan sa dap sa biang hi na lade ha ka jingpynmih bording bad ba yn lah ban die pat sha kiwei kiba donkam.
Haba bynrap shuh shuh ïa ka jingkren u bah Renikton Lyngdoh Tongkhar u la ong ba ka jingpyndonkam ïa ka lait ne bording ka la kylla long shibynta kaba donkam tam ha ka jingim jong ngi. Kumta u la ïaroh ïa ka sorkar kaba la wanrah shibun ki skhim ne ki lad jingïarap ha kaba ïadei bad kane ka bynta kaba long ka jingmyntoi bad ban pynbit pynbiang ïa u paidbah bad ka la ïarap kham bun ïa u duk u suk khamtam ha kum kine ki por ba ka bai shim konekshon ka long kaba rem bad uba bun hi um lah ne kot bor.
Ha kajuh ka por u la pynbna ba ka sorkar ka don sa kawei ka thong ne ka mission ha ka ban pynpoi um sha manla ki thliew ïing. Namarkata, u pan ïa ka jingïatreilang jong u paidbah na ka bynta ban pynurlong ia ki jingthmu jong ka sorkar ha ka ban kyntiew ïa ka bit ka biang u paidbah.
Haba kren maitphang halor kane ka jingrakhe u bah K. Kharraswai, Executive Engineer ka MePDCL, Shillong u la ong ba la rakhe ïa kane ka sngi ban pynsngewthuh paidbah halor ka jingpyntreikam ïa ki skhim kiba wan lyngba ka sorkar pdeng kum ka DDUGJY kaba naduh u 2013-14 shaneng bad ka Saubhagya Scheme kaba ka jingthmu ka long ban pynïoh bording ha manla ki shnong bad tnum ïing. U la ïathuh shuh shuh ba lyngba ka Saubhagya Scheme la lah ban tan bording tang kumba 1546 na ka bhah kaba la mang kumba 2211 namar ka jingpynthut jong ka COVID-19 da kaba bynrap ruh shen ba ynsa lah ban pyndep ïa ki longïing kiba sah bad ki ïing kiba dang mih thymmai lyngba ka Revamp Distribution Sector Scheme ka ban sa wan shen.
Ha kajuh ka por u la wer ïa ki nongïoh jingmyntoi ba lada don kano kano kaba kim sngewthuh ba kin kylli kum ha kane ka por na ka bynta ban ïoh ïa ka jingbatai kaba kham shai bad ban shim kabu lada wan kiba kum kine ki skhim ba wanrah da ka sorkar na ka bynta ka bit ka biang jong u paidbah bad kyrpad ruh ïa ki paidbah ban siew ïa kaei kaba ki la pyndonkam khnang ba kan nym buh jingeh ïa ka department ha kaba pynbit pynbiang bad pynïaid shakhmat ïa ki kam. Haba pynpaw ïa ka jingduna bording ha ka jylla u la pynpaw ba kathaduh mynta kaba bun ba bording ki hap ban thied nabar, kumta u la kyrpad ïa ki paidbah ban nang ban tyngkan bad ban leh adkar ha ka jingpyndonkam ïa ka bording.
Katba ha ka jingkren jong ka kong Caramai Kharkongngor, IAS, Deputy Commissioner ka South West Khasi Hills District ka la ong ba la rakhe ïa kane ka Bijili Mahotsav naduh ka 25 tarik haduh ka 30 tarik u ‘Naitung, 2022 ha kylleng ka ri da ka jingthmu ban tbeh jingshai bad ban ai bording ha manla ki shnong bad ki tnum ïing hapoh u snem 2047. Haba ban jur halor ka jingdonkam jong ka bording ha ka jingim jong ngi kaba manla ka sngi, ka la ong namarkata, ba ka donkam ïa ngi ki nongshong shnong ban shimkhia ban ym pyndonkam bakla ïa ka hynrei ngi dei ban nang ban kunai ha ka jingpyndonkam bad ban pyndep ïa ki jingsiew ha ka por kaba biang.
U P. Bhattacharya, Deputy General Manager, Power Grid, Shillong ruh u la kren ha kane ka sngi. U bah S.C. Laloo, ADC u la pynïaid ïa kane ka jingïalang, u Sordar jong ka Sohsyniang ula ai ïa ki kyntien pdiang sngewbha katba u bah O. Blah, Junior Executive Engineer u la ai ki kyntien khublei.
Ha kajuh ka por la pynbna ba nangne shakhmat katkum ka juk ynsa ïoh ban pyndonkam noh da u Smart Meter. Ha kane ka sngi ka la don ruh ka jingïamir jingmut hapdeng ki nongshong shnong bad ki nongtrei jong kane ka tnat. La ïoh ruh ïa ka jingpyni phlim halor ki projek jong ka sorkar India kum ka Village Electrification bad Household Connections bad ki schemes ki ban dang wan.
Katei ka jingïalang ka long kum shibynta jong ka jingrakhe ïa ka Azadi Amrit Ka Mahotsav kaba la sdang naduh ka 25 tarik haduh ka 30 tarik u ‘Naitung ka ophis jong ka Deputy Commissioner, South West Khasi Hills District, Mawkyrwat ryngkat ka jingïatreilang bad ka ophis jong u Executive Engineer, South West Khasi Hills Distribution Division MePDCL, Shillong ka la rakhe ïa ka taiew ha kaba ïadei bad ka Bijili Mahotsav halor ka phang ‘Ujjwal Bharat Ujjwal Bhavishya @ 2047’.
Ha kane ka sngi la sakhi ruh da ka jingïadonlang ki paidbah nongshong shnong kiba long ki nongïoh bynta lyngba ka bording, ki nonghikai bad kumjuh ruh ki samla pule jong ka St. Mary’s Rangblang Higher Secondary School, Rangblang Sohsynniang.