Long kiba trei shitom ha la ki shnong bad wat sngap ïa ki ktien ja-li ja-um jongno re : Prestone Tynsong

Mawkyrwat, Nailur 18 : Kum shibynta jong ka jingpynshai paidbah kaba ïa dei bad ka Elekshon Shiteng Samoi jong ka MP Lok Sabha na ka Shillong Parliamentary Constituency, mynta ka sngi ka 18 tarik u Nailur, 2026 ka National People’s Party jong ka Ranikor Block Unit ka la pynlong ïa ka jingïalang paidbah ha Shnong Rangthong, South West Khasi Hills District.
Ha kane ka sngi la donlang naduh u bah Prestone Tyngsong, Symbud Myntri Rangbah ka Jylla bad kum u State President jong ka National People’s Party (NPP), u Dr. D.R.L. Nonglait uba dei u Kyrtong MP na ka National People’s Party (NPP), u Dr. K.K. Nongsiej, District President jong ka National People’s Party (NPP), South West Khasi Hills District kiba la ai jingkren ha kane ka sngi.
Haba kren ha ka jingïalang paidbah ha shnong Rangthong, u bah Prestone Tynsong, Symbud Myntri Rangbah ka Jylla bad kum u State President ka National People’s Party (NPP) u la pynkynmaw sha ki paidbah nongkyrshan jong ka Ranikor Constituency ïa kiba bun ki kam ba ka Sorkar MDA ka la leh lyngba ki kam pynroi la ka long ki jaka pule, ki surok bad kiwei kiwei de kiba long ka jingmyntoi jong ki paidbah ka South West Khasi Hills District bad ka Jylla baroh kawei.
U la ong ruh ba watla kane ka Sorkar kaba hapoh ka jingïalam jong ka National People’s Party (NPP) ka la leh shibun bah ki kam, hynrei na ka mon bad na sha ka diang ki jingshah kynthoh ki bun bha kiba long kum ka jingpynthoh bria ïa ka party baroh kawei. Namarkata, ula kyrpad ïa ki paidbah nongkyrshan ba ïa kum kine ki jingkynthoh kim dei ban sngap, hynrei ki dei ban peit ïa kiba ki kam paw ne ïohi paidbah. U la kyntu ruh ïa ki samla jong kane ka juk, ba kim dei ban pynlut por than ha ki social media namar ïoh ki shah ïalam bakla namar kane ka juk, wat ïa u briew uba sniew briew ki lah ban pynbha briew bad kumta ter ter. “Ki kmie ki kpa ki dei ban kyntu bad ai mynsiem ïa ki khun ki dei ban peit ïa ki kam kiba bha khnang ban lah ban lait na ka jingshah ïalam bakla ha ki ktien shongbai jong no re jong no”, ong u bah Prestone.
Haba pan jingkyrshan na ka bynta kane ka jingïaleh MP Elekshon Shiteng Samoi, u bah Prestone u la kyntu ïa ki paidbah ba kin sngewbha ban jied ne kyrshan beit ïa u Dr. D.R.L. Nonglait ba un long u kyrtong uba poi sha ka thong khnang ba ki kam ki ba dang sahteng kum ka ILP, ka jingdawa ïa ka ktien khasi ban pynrung ha ka khyrnit kaba phra kin urlong, namar ma u u don lypa ha ka party kaba don ha ka bor synshar.
Ha ka jingkren jong u Dr. D.R.L. Nonglait uba dei u Kyrtong MP jong ka Shillong Parliamentary Constituency na ka National People’s Party (NPP), ha ka jingkren jong u u la pynsngew ha ki paidbah ïa ki kam ba u u la trei ha ki phew snem kiba la leit noh kum u u nonghikai ha ki kolej bad ki jingtreikam jong u ha ka imlang ka sahlang bad kum u President jong ka Khasi Authors’ Society (KAS).
Namarkata, u la buh ka jingkyrpad ïa ki paidbah nongkyrshan ba haba ki thmu ban jied ïa unongmihkhmat ba un leit kum u MP sha Delhi ki dei ban jied da u briew uba trei ïa ki kam namar ka party ka dei kum ka kamra jong ka jingtreikam ha kaba ki briew ki ïa bunkam ha ka, hynrei lada ki briew hapoh ka kamra ki thiah ki briew hangta ki kynslok bad ymdon jingmih kam haei haei ruh em. “Kum ki paidbah nongkyrshan kim dei ban peit party ne don ka jingsngew party hynrei ki dei ban peit ïa u briew uba trei, namar haduh mynta ngi dang donkam ïa ka jingïalam jong u Conrad Sangma, u bah Prestone Tynsong, u Ma Sniawbhalang Dhar kiba long ki nongïalam kiba khlaiñ kumta mynta ngi donkam sa ïa u MP uba lah ban long ka jingkieng ïa ka Secretariat nangne na Shillong bad ka Nongbah Delhi”, ong u Dr. Nonglait.
Kiwei de kiba la ïa donlang ki long u bah Hamletson Dohling, State Working President ka National People’s Party (NPP), u bah H.M. Shangpliang uba dei u Nongaiktien jong ka National People’s Party (NPP), u bah Kitbotlang Nongrem uba dei u State Secretary ba peit ïa ka National People’s Party (NPP), South West Khasi Hills District uba la pynïaid ïa ka jingïalang ha ryngkat ka jingdonlang ki nongkyrshan na kylleng ki shnong hapoh ka Ranikor Block.
La pynshit pynshngaiñ ïa kane ka program da ka jingrwai na ka MaYan “Ki Sur ki Khana”.