Ka jingjop ha ka lynti ïaid jongphi kam dei ba shu wan hi kumto hynrei phi dei ban wad ïa ka

Shillong, Nailur 18: Ka Seng Samla Shnong Laitkor Pyllun ha ka jingrakhe dap 17 snem jong ka seng kala pynlong ïa ka jingpynkup burom ïa ki samla pule kiba la pass bha ha ka eksamin SSLC bad HSSLC bad kila pynshlur ruh ïa ki samla pule ki ban sa ïakhun ïa ka eksamin SSLC mynta u snem.
Ha kane ka jingrakhe bad pyndon burom ïa ki samla pule la pynlong ha ïing shnong jong ka Dorbar Hall Laitkor Pyllun, ha ka jingsakhi lang jong ki Rangbah Shnong bad Secretary jong ki saw tylli ki dorbar shnong, ki nongmih khmat na ka seng Kynthei.
Ha kane ka sngi la sakhi lang ruh da ki kmie ki kpa jong ki khynnah kiba ioh pdiang ïa ka khusnam bad na ka liang u MLA bad MDC barim jong ka Nongkrem Constituency u Bah Lambor Malniang u la shim ïa ka bynta kum u kongsan.
Kane ka sngi kadei ruh ka sngi ba pynskhem ïa ki nongkitkam ba thymmai jong ka seng na ka bynta ka samoi trei kam 2025 haduh 2030.Ki samla kiba la shah pynkup burom ki don 38 ngut kiba la pass bha ha ka SSLC bad HSSLC jong u snem 2025 bad 2026.
Ïa ki khusnam sha ki khynnah la sam da u Bah Lambor Malniang, u Bah Johnystar Mawrie uba dei u Chief Adviser jong ka seng nalor kiwei pat.
Haba kren kum u kongsan u Bah Lambor u la ong, Nga kmen ha ka shi bynta bad nga sngew blaw ruh shi bynta, Nga kmen ban ioh sam ban ai da ki kti ki jong nga ban kitbok ïa kine ki khun samla hynrei nga sngew blaw namar ba ngam shym la lah shuh ban ban ai kumba nga ju ai ban pyndap ha ka bai rung skul ne ban thied kot hynrei mynta ngam lah shuh.
“Wat lada ngam lah shuh hynrei ngin dang ïai pytyllun ngin dang ïai don ryngkat bad phi bad ngan ym ieh ïa ka seng samla namar ba phi don ka jingshanniah ka jingsngew skhem ba phi khot ïa nga mynta ka sngi namar kadei lyngba ki kam kiba ngi la dep ban ïatrei ha ki por ba la leit noh” ong u Bah Lambor.
Ka ktien ka ong, “Ngi lah ban duh ïa ki jingdon jingem hynrei to tip ba ïa ka jingstad ba u blei u la ai ha phi yn ym lah ban duh mano manor uh bad ha kajuh ka por kane ka kren kyllum ïa baroh ki khun samla kiba don hapoh kane ka shnong” ong u Bah Lambor.
Shuh shuh u la ong, “Ka jingjop ha ka lynti ïaid jong phi kam dei ba shu wan hi kumto hynrei phi dei ban wad ïa ka bad haba wad bad trei shitom hangta ka dur jong phi kan tyngshain bad ba tyngshain tang ka dur ka jong phi ka pyntyngshain ruh ïa ka dur ki kmie ki kpa, ïa ka shnong ka thaw bad ïa ka ïing ka sem baroh kawei”.
U Bah Lambor u la ong, Ai ba kane ka jingtyngshain kam dei ban lip rong noh hynrei ha u snem u ban sa wan ngan sa ïa pynbeit kyrpang bad Seng Samla Laitkor Pyllun ba la kumno kumno ngin ioh ban khamleh kham bha shuh shuh ban wad ïa ki lad ki lynti ban ioh katkum ba la mang.
Ha kane ka sngi la ioh ruh ka jingkren na u Bah Johnustar Mawrie uba dei u Chief Adivser jong ka seng samla shnong Laitkor Pyllun, ki Rangbah Shnong bad kiwei kiwei de.