Ïa ka ophis ba pura jong ka Ri Muliang C&RD Block yn tei beit ha shnong Tynghor: SNSRM

Nongstoiñ, Nailur 17: Ha ka sngi palei kaba dei 17 tarik Nailur 2026, ka Synjuk ki Nongsynshar Shnong ka thaiñ Ri Muliang (SNSRM) kiba kynthup ïa ki 60 tylli ei ei ki shnong kiba na ka thaiñ Tynghor, kiba kyrshan bad mynjur ban buh ïa ka Rimuliang C&RD Block ha ka shnong Tynghor, ka la lum ïa ki paidbah nongshong shnong ban ai jingpynshai halor ka jingwan ïakren jong ki ïa u Bah Prestone Tynsong Symbud Myntri Rangbah ka Jylla Meghalaya, ha ka jingïakynduh ba ki la leit ha ka 9 tarik u Nailur 2026 hapoh Secretariat Shillong.
Ha kane ka jingïalang paidbah ïa kaba la pynlong ha madan shnong Tynghor, la ïohi ba ki briew kaba kynthup ïa ki samla, rangbah bad ki longkmie, kynthup ïa kiba na ki shnong Khasi bad Garo kiba la wan mih madan ban ïashimbynta ha kane ka jingpynshai jong kitei ki nonglamkhmat jong ka Synjuk.
Ha katei ka jingïalang la ïoh ban ai jingkren lang da u bah Nasar Jahnoh Sirdar ka Jyrngam Sirdarship, samla Distarborlin Wanñiang nongaiktien ka Synjuk, u Spren G Momin na ka shnong Rangsapara bad kiwei kiwei.
Na ka liang jong kine ki nongïalam ki la pynpaw ba kane ka jinglum jong ki ïa ki paidbah ban pynshai, ka long ba ki paidbah kin shai bad ïoh sngew da la ki jong ki shkor na ki nongïalam, ba ïa ka Ri Muliang C&RD Block yn buh bad tei beit ïa ka ophis ha shnong Tynghor bad ym lah shuh ban shim da kiwei pat ki rai.
Na ka liang u Bah Distarborlin Wanñiang nongaiktien ka Synjuk u la ong, “Ka jingai khublei ka long khamtam ïa ka sorkar kaba la sngap ïa ka sur bad jingud jingnam jong ngi kiba bun balang, namar kam dei kaba u MLA lane u MDC kiba leh donbor ïa kane ka kam, lane ka sorkar lane mano mano. Hynrei naduh ka sngi kaba sdang hi ngi dawa ïa kane ka Block namar ki paidbah hi kiba bun ki I mon ban buh ïa ka ophis treikam ba pura jong ka Ri Muliang C&RD Block ha Tynghor”.
Ngi ngim lah ban klet bad shu ieh ïa ki paidbah ha ka umdum namar haba ngi dawa nyngkong eh ngi lum ïa ki paidbah.Hynrei haba mynta ka kam ka la urlong, ka dei ruh ka kamram jong ngi kum ki nongïalam shnong ban pynshai bad ai ka jinghun sha ki paidbah.Kumba ki la bynshet ha ngi ka Synjuk ban tur ïa kane ka kam, ka dei ruh ka kamram ba ngin ai ka jingshai sha ki paidbah”.
U la ong ruh, “Ym shym don mano mano ba leh donbor bad ym dei ruh ba ngi ïaleh politik bad no bad no, kam dei ruh ka kam kaba pynïohnong ïano ïano.Hynrei, ka dei beit na ka bynta ka jingïohnong jong kiba bun balang, u luk u lak bad baroh kiba hap hapoh jong ka Ri Muliang C&RD Block”.
Na ka liang u Bah Nasar Jahnoh Sirdar ka Jyrngam Sirdarship u ba la pynïaid ïa katei ka jingïalang kum u shongknor, u la ong ba ki paidbah kiba wan ki dang dei tang kumba katto katne ngut ei.Namar ym shym la khot lut ïa baroh ki nongshong shnong katei ka thaiñ ha katei ka jingïalang.U la ong ba bun kiba dang shah teh shah khum ha la ki kam kiba ki ju trei ha la ki lyngkha man la ka sngi.