Nongstoiñ, Nailur 17: U Superintendent of Police ka Mairang Eastern West Khasi Hills District ha ka jingpynlait khubor, u la pyntip paidbah ba ki pulit jong ka Eastern West Khasi Hills District, ki la ïoh ïa ka rai jong ki Saw tylli ki mukotduma, kynthup ïa lai tylli ki POCSO Act kiba hap hapoh ka jingkhmih jong ka Mairang Police Station, ha kaba ki la shah rai pynrem hakhmat ka Ïingbishar ba don burom jong ka Hon’ble Court bad Juvenile Court.
Kawei na kine ka dei ka Mairang PS Case No. 32(08)2021 U/S 326/307 IPC, ha kaba u Borda Kharnongbak u ba shah kynnoh la lap ba um shym donkti halor ka kam runar katkum ka Section 326/307 IPC. Hynrei, la shem bad pynngat ïa u katkum ka jingdonkti jong u hapoh ka kyndon aiñ 324 IPC.Ïa kane ka kam la tohkit bad pynngat mukotduma da u SI K.Dkhar.
Ïa u ba la donkti la rai pynrem ha kaba u la dei ban pyndep ïa ka jingshah pynsaja katkum ka kyndon aiñ ryngkat ka kuna kaba u hap ban siew kaba long T.10,000/. Lada um lah pat ban siew ïa katei ka kuna, un hap ban shah set phatok sa hynriew bnai.
Shuh shuh, ka Mairang PS Case No. 58(09)2024 U/S 5(k)(l)(n)/6 POCSO Act ha kaba la shim ïa ka jingtohkit bnïah da WPSI B. Nongrang, u nongshah kynnoh u Hoping Mawlong u la shah rai pynrem katkum ka Section 6 jong ka POCSO Act, halor ka kam leh beijot, da ka jingshah set along kaba 20 snem ryngkat bad ka kuna kaba 50,000 tyngka bad hynriew bnai ka jingshah set, lada um lah ban siew ïa katei ka kuna.
Hynrei ha ki ar tylli kiwei pat ki mukotduma, kata ka Mairang PS case No. 41(07)2026 U/S 5(j)(ïi)(l)/6 POCSO Act bad ka Mairang PS case No. 108(11)2025 U/S 5(m)(n)/6 POCSO Act, ha kaba ïa ka jingtohkit la shim da ka WPSI A.Thongni, ha kaba ki ar ngut ki khynnah kiba la shah kynnoh ki la ïatyngkhuh bad ka aiñ katkum kitei ki kyndon aiñ ba la pynngat ïa ki, la shim bad shong bishar da ka Juvenile Justice Board, Eastern West Khasi Hills District, kaba long katkum ka Juvenile Justice (Care and Protection of Children) Act, 2015.
Katkum ka rai ba la pynmih ha ka 7 tarik Nailur 2026 bad kawei pat ba la pynmih ha ka 10 tarik Nailur 2026, la pynngat ïa ka jingsiew kuna kaba 1000 tyngka ïa uwei bad 2000 tyngka ïa uwei pat, ha kaba la bthah ïa ki ban siew sha ki lanot. Shuh shuh la rai ruh ba ki dei ban pyndep ïaka jingshah syllok haduh ba kin da dap 21 snem ka rta kynthup ruh hynriew bnai ka community service hapoh ka jingpeit jingkhmih jong ka aiñ.
Kane ka jingshah rai pynrem jong kine ki saw tylli ki mukotduma ka pyni shynna ïa ka jingshimkhia bad jingtreishitom jong ki pulit ka Eastern West Khasi Hills District, ban pynthikna ïa ka jingïada bad jingshngaiñ jong ki khynnah bad ban pynngat ïa ki nongleh kam sniew ha ka kti jong ka aiñ bad ban pynïoh pat ïa kiba ngat ha ka lanot ïa ka hok jong ki.
