Ai ksai u President ka UDP ba lah ban shah sympat shabuk u MLA ka West Shillong ba kren pyrshah party

Shillong, Nailur 16 : U President ka UDP u bah Metbah Lyngdoh mynta ka Sngi Balang u la aiksai ba u MLA ka West Shillong u bah Paul Lyngdoh u lah ban shah sympat shabuk halor ki jingkren pyrshah party jongu khamtam hadien ka jingbuh jingkylli jongu halor ka kam nongïalam.
Haba kren sha ki lad pathai khubor u bah Metbah u la ong ba ka Party ka la shim khia bha ïa kane ka jingkynthoh jongu.
“ Une u MLA jong ka Party u la ai jingkren kaba long pyrshah ïa ka Party bad ngi la shim khia ïa kane bad ngin sa ïa shong pyrkhat ban shim ïa ka rai kaei kaba ka party kan leh” ong u bah Metbah.
U bah Paul Lyngdoh dang shen u la ai jingkren ba ki Nongïalam kiba rim ki la phet na ka UDP hapoh ka jingïalam jong u bah Metbah Lyngdoh bad buh ka jingkylli kane ka dei ka jingbym tbit ban ïalam ïa ka party?
Haba jubab halor kane u President ka UDP u la ong “ Kam dei ka rukom ïa nga ban jubab halor kane, Kan kham bha ba kiwei kin jubab na ka bynta jong nga kata hi kaba biang. Ba ngan shu kren hangamei shaphang ïalade nga tharai kiwei kin ym sngewtynnad satia bad nga shu kiar hi ruh ban leh kumta baroh shi katta ruh”
Haba ïada ïa ka samoi treikam jongu u bah Metbah ula ong “ La nga long kum u President ka Party lane kum u MLA ka Constituency jong nga lane kum u Myntri ha ka sorkar kano kano ka jingpynkit lyngkor ïa nga nga pynthikna ba ngan lah ban trei bad leh ïa kaei kaba ki khmih lynti na nga bad kane ka dei ka jinglong ba shimkhia jong nga namar nga kwah ban leh ïa kaba bha tam”.