Ka Fact Fingding Committee ka dei tang ka buit ban pynslem kan nym poi shano shano ruh: JNC

Khliehriat Nailur 11: U President jong ka Jaiñtia National Council, u bah Sambormi Lyngdoh mynta ka sngi, haba kren sha ki pathai khubor u la ong ba ka seng ka dap da ka jingsngewlyngngoh ban ïohi ba wat hapdeng ba ka sorkar ka la thaw ïa ka committee bad la tip kum ka Fact Finding Committee bad la pynbna ruh ïa ka status quo hynrei ki kam jong ka Shree cement ki dang ïaid shakhmat na ka bynta ban ioh ïa kata ka environmental clearance jong ka, dang ha kane ka 8 tarik u September na ka Liang ka State level Expert Appraisal Committee SEAC ka la pdiang ïa ka jingkyrpad jong ka Shree Cement kata ban wanrah ha ka jingïalang jong ka na ka bynta ban ïakren bishar halor ban ai ïa ka environmental clearance ia ka Shree cement.
U nongïalam ka JNC u la ong “Haba bishar bha halor ki kam ki jam bad ki jinglong jingman Jong ka Shree cement, ngi ïohi ba kane ka Fact Finding Committee ka dei tang ka buit jong ka sorkar ban pynthame lane ban divert lane ban ïalam bakla ïa ki nongshong shnong ka jylla bad kane ka Fact Finding Committee ka dei ka buit lane ka tactics jong ka sorkar ban ïalam bakla ïa ki trai jaka bad ïa ki nongrep kiba don ïa ka hok ha uto u lum Syrman bad ngi tip shai ruh ba kane ka committee kam ïapher eiei bad kiwei ki Committee, namar haba don kino kino ki jingiakhih ban dawa ïa kano kano naka bynta ka Ri bad ka jaitbynriew, ha kaba kut hi ka sorkar ka ju thung ïa kita ki Committee bad kine ki committee kim ju poi shano shano, hynrei kidei tang ki buit jong ka sorkar ban pynslem ïa ki kam. Haba phai sha ka committee kaba ka sorkar ka thung (high level committee ) naka bynta ban pynkynriah ïa ki harijan na them metor ngi iohi ba haduh mynta kam pat wanrah ïa u soh bad kam poi shaei shaei ruh, haba phai sha ka kam thungkam thungkam ka reservation policy ngi iohi ba kane ruh ka kut tang ha kata ka committee bad kam lah ban wanrah kaei kaei ruh na ka bynta ka jingmyntoi u paidbah, te ha kane ka fact finding committee ruh jong ka Shree cement kan dei kajuh hi bad kata tang ban ialam bakla ïa u paidbah bad ngi tip shai ba kan nym poi shaei shaei ruh”.
“Ngi dang shu iohi ba na ka liang ka sorkar ka la ong ba kane ka fact finding committee ka la sdang treikam hynrei kaba pynlyngngoh pat ïa ngi ba haduh mynta ngim pat ïohi ba ka sorkar kan pynbna ne pynmih ïa ka notification ha kaba ïadei bad ka rukom treikam jong ka committee, ki kyndon treikam jong ka bad kumjuh ïa ki dkhot kane ka Committee bad haduh mynta ngim pat tip ba mano ba khlieh ïa ka Committee bad haduh katno kane ka Committee kan bam por ban wanrah ïa ka bui kaiphod ne report jong ka sha ka sorkar halor kine ki jingjia hapoh East Jaiñtia Hills khamtam halor ka jingshah leh donbor ïa ki paidbah bad ïa ki jaka puta jong ki bad kane ka Committee ka dang long tang ka syrngiew bad ngim pat lah ban shaniah ïa ka. Te ngi na ka liang ka JNC ngi kwah ban pyntip sha phi ki paidbah khamtam sha ki nongshong shnong ka Ri Jaiñtia kaba ieid eh jong ngi, khnang ba phin tip ïa ki jingmut bad jingthmu jong ka sorkar bad ym shah ïalam bakla ha ki buit jong ka sorkar bad kane ka fact finding committee kan nym lah ban shakri hok ïa ki jingeh jong ki paidbah lada ki kam ki jam jong ka Shree cement, ki kot ki sla lane ki paper work jong ka ki dang ïaid shakhmat namar kan myntoi aiu ïa ka ta ka fact finding committee ban tih bniah halor kato ka public hearing lada ka Shree cement ka ioh suk ïa ka Environmental Clearance, namar ka public hearing hi ka dei thik na ka bynta ka Environmental Clearance bad ka CTE, kane ka mut ba lada ki kot ki sla ki ïaid shakhmat kane ka fact finding committee kam don jingmut eiei bad kan dei hi tang ka buit lane ka tactic jong ka sorkar ban pynslem ïa ka kam bad ngi na ka liang ka JNC ngin sa shong pyrkhat halor kane ka kam buit tuh jong ka sorkar bad ngin nang ïai dawa haduh ba ki trai jaka bad ki nongrep kin ïoh ïa ka hok jong ki, kane kadei ka khubor shaka sorkar bad sha ki nongshong shnong ka jylla hi baroh kawei,” ong u nongïalam ka JNC.