Pep ki 6 ngut ki MLA ka UDP ban wan sha ka CEC
Kam don satia kano kano ka jingthmu phet seng: Titos
Shillong, Nailur 11 : Hadien ba ki hynriew ngut ki MLA kila pep ban wan sha ka Central Executive Committee (CEC) bad ka jingrakhe ïa ka Foundation Day, ka UDP ha ka sngi Thohdieng kala ban jur ba ka Ïing jong ka, ka long kaba iaid beit iaid ryntih bad kam don satia kano kano ka jingthmu phet seng.
Ki hynriew ngut ki MLA ka UDP kiba pep ki kynthup ïa u MLA ka West Shillong Bah Paul Lyngdoh, MLA ka Sohiong Bah Synshar Roy Kupar Lyngdoh, u MLA ka Mawphlang Bah Matthew Beyondstar Kurbah, MLA ka Ranikor Bah Pius Marwein, MLA ka Khliehriat Bah Kyrmen Shylla bad MLA ka Nongpoh Bah Mayralborn Syiem.
“Ngi don ïa ka jingialang CEC ba sngewtynnad bha.Ki nongialam na ri-lum Garo, East bad West Jaintia Hills ruh kila wan” ong u General Secretary ka UDP Bah Titosstarwell Chyne haba ïakren bad ki nongthoh khubor.
Haba kam ba 5 ngut ki MLA kila wan sha ka jingialang, u Bah Titos ula ong “Kat haduh mynta, kam pat don eiei kaba kum kata.Ka jingkylli kam mih satia ban don ka jingkynthih lane mih na ka party.Kin dang ïai don bad ka party kumba ka long”.
“Mano ba pynmih ïa ka tdem ne ka ding? Ngim dei ma ngi ba pynmih ïa kane.Ka party jong ngi ka dang ïatylli, ki MLA jong ngi ki dang ïatylli” ula pynpaw haba bynrap “Kumba kila pynshai hapoh ka CEC, kam don satia kano kano ka jingthmu phet seng ïa mynta.Ngim lah pat ban batai lypa ïa kaei ka ban jia lashai ka sngi”.
Haba pynksan ïa ka jingpep ki MLA, u bah Titos u iathuh “U bah Synshar ula pyntip ba don kiba iap bahaïing bad um lah ban wan.U Bah Pius Marwein um don satia ha Shillong, ula leit donkam shabar.Kiwei ki MLA kila pyntip ba ki don ïala ki prokram”.
Halor ka jingpep sha ka jingrakhe ïa ka sngi seng ia ka UDP, ula ong “Ngi la khot ïa baroh.Lehse kim lait por.Ngim lah ban pynbor ïano ïano ruh lada ki don da kiwei pat ki kam”.
Halor ki khubor ba ki MLA ka UDP kila ïasah ha Delhi ban ïakynduh ïa ki nongialam ba hakhlieh ka BJP, u bah Titos ula ong “Ki MLA ki long laitluid ban leit sha Delhi, Kolkata.Kam dei ka jingpeit jong ngi shano ba ki leit.Ki lah ban ïakynduh ïa ki Myntri ka Sorkar Pdeng ne Myntri Rangbah Duh.Kam dei eh ba shisien ba kila ïakynduh ïa u Amit Shah ne u Myntri rangbah Duh, kin ïasoh noh sha ka BJP.Nga dalade nga ïakynduh ïa ki Myntri ka Sorkar Pdeng, nga ïakynduh ïa ki Nongialam BJP, phim lah ban ong ba ngan pyniasoh sha ka BJP”.