Tyrwa ka Sorkar jylla ïa ka surokbah ban pynïasoh naduh West Garo shaduh East Jaiñtia: CM

Shillong, Nailur 11 : Ka Sorkar jylla ka la tyrwa ia ka project ban pyntrei ïa ka surok bah ka ban pynïasoh ïa ka Meghalaya bad ki Jylla kane ka thaiñ Shatei Lam Mihngi, ka ban sdang na West Garo Hills bad kut ha East Jaintia Hills.
ïa kane la pyntip da u Myntri Rangbah ka Jylla Conrad K Sangma haba plie paidbah ïa ki katto katne ki kam pynroi bad buh mawnongrim ïa ki project kiba kongsan ha Tikrikilla bad Raksamgre, kiba don ha West Garo Hills.
“Ngi la tyrwa ïa ka surok kaba heh bha naduh Dalu sha Baghmara, Baghmara sha Ranikor, Ranikor sha Shella bad Ratacherra shaduh sha khappud ka Bangladesh” ong u Conrad haba bynrap “Ynda la pyndep ïa kane, kan sa pynïasoh ïa ka Silchar, Manipur, Mizoram bad Tripura bad kan pynkylla ïa ka khaïi pateng bad ka ïaid ka ïeng ha ka thaiñ”.
Ula pyntip ruh ba ka jingkieng ba pynïasoh ïa ka Dhubri-Phulbari, ka project ba 3,500 klur tyngka bad ka jingkieng ba jrong eh ha ka thaiñ lam mihngi ka Jylla, kan plie lynti ïa ka khaïi ka pateng na ka bynta ka thaiñ Shatei Lam Mihngi baroh kawei. Kane ka jingkieng kala jan dep artad.
Ki project bala plie paidbah bad ki maw nongrim ba buh ha Tikrikilla bad Raksamgre ki kynthup :
(i)Buh mawnongrim ïa ka jingkieng maw (PWD Roads) ha Jangrapara, Raksamgre (ii)Plie ïa ka Tourism Guest House ba thymmai ha Nagargaon, Tikrikilla (iii)Buh mawnongrim na ka bynta ka Tourism Guest House ba thymmai ha Raksamgre.
Ha kane ka jingïalang, u Myntri Rangbah ula plie paidbah ruh ïa ka Agro Processing Unit shimet ba dang shu plie thymmai-ka Megha Agro Gold ha Tikrikilla, ka ban tylliat ïa u kwai, sohtrun bad sohphan ba pynmih na ka thaiñ.
Haba ai jingkren, u Myntri Rangbah ula ong ba ka Sorkar ka la pynleit jingmut ha ka roi ka par bad ka jingkiew shaphrang jong ki jaka nongkyndong bad ki jaka ba don sha jngai eh jong ka Jylla.
“Ka jingpynïasoh surok ka dei kaba ïasoh beit beit bad ka jingroi ka ïoh ka kot bad kyntiew ïa ka kamai kajih. Na kata ka daw ngi la buh hakhmat eh ïa ka kam shna surok” ong u Myntri Rangbah.
Haba kdew ïa ki jingkylla ha ri-lum Garo, ula ong “Ka surok na Baghmara sha Rongara mynshuwa ka ju shim por kumba 3 kynta. Mynta ka shimpor tang 30-45 minit. Na Rongara sha Ranikor kaba ju shim por mynshuwa 3 kynta, mynta ka shim por tang 1 kynta”.
U pyntip ba ha ki 7-8 snem ba la leit, ka Sorkar ka la shna la jan 3,500 km ka surok thymmai ha ka Jylla, kaba long 1.1km ka surok man ka sngi. Ula ong ba ïa kum kane ka jingshna surok ym pat ju sakhi ha ki 20 snem ba la leit noh.
“Ka roi ka par kam lah ban jia tang ha ka shimiet, hynrei ngi hap ban buh mawnongrim ïa ka jingkiew shakhmat. Ngi la tei ïa ki jingtei, hynrei ngi hap ruh ban siew ïa ka tulop sha ki nonghikai bad ki nongtrei. Ngim don satia ïa ka mang tyngka kaba pahuh, hynrei ngi hap ban jied ïa ki kam kiba kongsan bad trei naduh ka mynsiem” ula bynrap.
U Myntri Rangbah u ong ba nalor ka surok, ka Sorkar ka la trei ruh ïa ka kam ban pynbun ïa ki jingtei kiba donkam jong ka imlang sahlang. Ula pyntip ba palat 200 klur tyngka la mang ha kine ki 4 snem na ka bynta ki 56 tylli ki Block ha baroh kawei ka Jylla ban tei bad pynbha ïa ki skul, ki ophis jong ki block bad ki jaka sumar.
U Myntri Rangbah ula ai ka jingïaroh ïa ka GHADC hapoh ka jingïalam u CEM Dhormonath Sangma bad a baroh ki MDC kiba la wanrah a ki jingpynkylla kiba khraw hapoh ka Council.