Ther u bah Lahkmen ïa ka VPP wat ju pynduh mynsiem ïa ki Sahep Sorkar kiba trei hok

Shillong, Nailur 11 : U Myntri ka tnad Pule Puthi u Bah Lahkmen Rymbui ha ka Sngi Thohdieng ula ther kylla tyngeh ïa ka Voice of the People Party (VPP) halor ka jingdawa ban weng ïa u Commissioner & Secretary ka Tnad pule puthi u Vijay Kumar Mantri, da kaba ong wat pynduh mynsiem ia ki ophisar kiba trei hok ia ka kam namarba une u dei u Ophisar uba trei shitom bha bad u Ophisar ba lah ban ïakynduh mano mano ruh hapoh ka Tnad.
“Nga la ïohi ïa ki daw bala kdew da kane ka seng saiñ pyrthei. U Vijay Mantri u dei uba trei shitom bha bad u Ophisar ba lah ban ïakynduh da mano mano ruh” ong u Bah Rymbui.
U ong ba u Mantri u lah ban nym lah pynbeit ïa man ki jingeh hangne hangtai hynrei u dei uba sngap. “U shah skhor bha bad u don ïa ka bor ban sngewthuh bad ban pynbeit ïa ki jingeh” ula ong.
Haba ther kylla ïa ka jingkynnoh ka VPP ba u Mantri um ju sngap ïa ki nonghikai, u bah Lahkmen ula ong ba kane ka long kaba bakla hi khait.
“Ha ka por ba ki nonghikai ki ïashah thngan ha Malki, ula leit dalade haduh arsien kum u nongmihkhmat ka Sorkar ban ong ha ki ba ngi la wanrah ïa ka rukom siew tulop ba thymmai. Ka jingdawa ka long ban pynkiew ïa ka tulop bad ka jingshngaiñ ha ka rukom im. Hapoh u Myntri Rangbah Conrad K Sangma ngi la trei shitom halor kane. Ula ïakynduh ïa bun tylli ki Seng, kaba lam sah ka jingsiew tulop ba thymmai” ong u Bah Rymbui.
“Kum u khlieh ka Tnad, ula pyrshang katba lah bad pynsngewthuh ïa ka Sorkar ba kan shim ïa ki sien jam kiba eh” ula ong.
Haba kynther ïa ka VPP, u Bah Rymbui ula ong ‘Lada phi lah ban ithuh ïa u Ophisar ba kham treikam bha ban ïa u Vijay Kumar Mantri, sngewbha pynithuh ïa u. Kam don jingma satia. Ngi don arngut ki Commissioner & Secretary bad ki la treikam bha. To ngin ym pynduh mynsiem ïa ki Ophisar kiba pyrshang ban trei na ka bynta ki kam kiba bha”.
“Um don uwei ruh uba biang lut, Nga ruh ngam biang lut, hynrei ngi la pyrshang ban pyndep ïa la ki kam ba la shim jingkitkhlieh” ula bynrap.