Sdang ka audition NE Star ban wad bad kyntiew ïa ki sap rwai ki samla ha Highland Toyota
Shillong, Nailur 11 : Ka NE Star :Ultimate Music Talent Hunt ba la kyrshan da ka Toyota bad pynïaid da ka Unitex Inc. ka la pynlong ïa ka Live Audition ha ka 10 tarik Nailur ha Highland Toyota, Mawiong Rim, Shillong.
Ka NE Star kaba dei kawei na ki rynsan kaba heh ha ka thaiñ Shatei Lammihngi (North East) kaba pynïasoh bad ka Indian Performing Right Society (IPRS) ban wad, ban pynpaw pyrthei bad ban kyntiew ïa ki sap rwai jong ki samla na kane ka thaiñ.
Ka jingpynlong ïa kane ka Audition ka ïahap ruh bad ka jingrakhe jong ka Highland Toyota ïa ka jingshakri kaba 15 snem ha Meghalaya.
Haba aijingkren ha ka jingïalang u Managing Director ka Highland Toyota u Rahul Dev Sharma u la ong ba kane ka sienjam ka pynpaw ba ka Toyota ka don ïa ka jingngeit na ka bynta ban plielad ïa ki samla ym tang ha ki kam ba ïadei tang ha ka liang ka leit ka wan. “Ka put ka tem bad ka rwai ka siaw ka dei ka dohnud bad ka mynsiem jong ka Meghalaya, bad ka NE :Star kan ai rynsan bad kyrshan ïa ki sap ki phong kiba mih na ki shnong ki thaw.”
“Sha baroh ki nongtem nongput, nongrwai ba don sap bad ki kynhun kiba ïashim bynta mynta ka sngi :Kane ka dei ka rynsan na ka bynta jong phi. Pynpaw ïa la ki sap da ka jingsngew skhem bad lehkmen ha kane ka khyllipmat ka ban pynsah kynmaw ïa ngi. Man ki jingïaid lynti ba khraw ki sdang lyngba ka jingplielad plie lynti, bad lehse kin don ki khlur bathymmai ki ban sdang ïa ka jingïaid lynti mynta ka sngi nangne na Highland Toyoto,” u la ong.
Ki nongïashim bynta kiba wan ha ka kyrdan kaba nyngkong bad ba ar na kane ka audition ha Mawiong Rim kin shah jied ban mihkhmat ïa ka jylla ha ki jingïakop ki ban dang ïaid shakhmat. Katba ïa ka result yn sa pynbna ha ka 16 tarik Nailur lyngba ka official Instagram page @Nestar.official.
ïa kum kine ki audition la pynlong ruh ha baroh ki phra tylli ki jylla jong ka thain Shatei Lammihngi.Katba ia ka grand finale yn pynlong ha Guwahati ha ka 27 tarik Nailur.
Haba kren halor ka jingïaid lynti jong ka Highland Toyota, u Sharma u la ong, “Ngi la kynjoh sha ki 15 tylli ki snem jong ka jingshakri ha Meghalaya, bad ngi ai khublei ïa ki customer bad ki nongkyrshan jong ngi namar kane ka jingkyrshan kaba ki la ai.”