Kynnoh ka KHNAM ba ki nongtrei ba siew bainong ha SAD ki dei kiba la shu thungkam da kaba shu phone

Shillong, Nailur 11: Ka Khun Hynñiewtrep National Awakening Movement (KHNAM) ka la kynnoh ba ki nongtrei ba siew bainong sngi ha Secretariat Administrative Department (Naarat) ki dei kiba la thungkam tang da kaba shu phone khlem da ki kyndon ne da ki jingthoh, kaba plie lad ïa ka jingthungkam briew lajong. Ïa kane na ka liang ka KHNAM ka la kynnoh ha ka jingïakynduh ïa u Nazir ha ka sngi Thohdieng.
Shuh shuh ka Khun Hynñiewtrep National Awakening Movement (KHNAM), ha ka jingujor sha u Myntri ka Tnad SAD, ka ong ba kat kum ka jubab RTI ka tnad kam shym la don satia ïa ki kyndon ban khot trei ïa ki nongtrei ba siew bainong sngi.
Na ka liang jong u Working President ka KHNAM u Bah Thomas Passah u la ong, “ïa ki nongtrei ba siew bainong sngi la khot ban thungkam tang da kaba shu phone bad ka shong ha u Nazir ban rai ïano ban phone bad ïano ban nym phone.”
U Bah Thomas ula ong ba da ki sap ngut ki nongtrei la siew bainong sngi kat kum ka dor ba buh da ka Tnad Labour, hynrei hadien ba shimti une u Nazir ba mynta, ki nongtrei kiba la don 10 sngi ha ka jingshakri kila shah weng lut.
U la kynnoh da kaba ong, “Hadien ba une u Nazir ba mynta u shimti ïa ka kam, ki nongtrei kiba la shakri palat ïa ka 10 snem kila shah weng bad la bujli da ki briew kiba ïajan bad u Nazir”.
Ka KHNAM ka kam ba 10 ngut kum kine ki nongtrei kiba la shakri palat 10 snem kila shah pynduh ïa ka RCW hapoh ka scheme 1996.
“Kine ki nongtrei kila shakri hok la palat 10 snem hynrei naba u Nazir u pyrshah ïa ki, kila duh ïa ka lad ban kamai na ka bynta ka ïing ka sem,” u la bynrap.
U la ïathuh ba ka RTI ka pyni ba ka jingthungkam ka long kaba shipor na ki kam kiba lait bad la pynkut noh ynda ka thungkam pura, hynrei kane ka jingleh pat ka long kaba la leh da kaba shu jied briew.
U la ong, “Ngi la pan RTI la bun tylli bad ngi la aiti ia ka jingthoh sha u Chief Secretary bad Secretary ka SAD haba khmih lynti ba kin shim ïa ka sienjam ban pynbeit, hynrei ym shym la leh eiei satia.”
Haba dawa ban leh eiei, ka KHNAM ka ong, “u Nazir ula don don bynta ha ki kam leh shiliang bad jied briew lajong, kumta na ka bynta ka jingbha ka synshar khadar, dei ban weng noh mardor ïa u Nazir bad bujli da ki briew kiba trei bha bad ba lah ban trei ïa ka kam”.
Ka KHNAM kala dawa ban thungkam biang ïa ki 10 ngut ki nongtrei bad ai ïa ka RCW kat kum ka Regular Casual Worker Scheme 1996.