Nongstoiñ, Nailur 11: Ka surok na Rwiang shaduh Athiabari kumba 51 kilomitar, ka la long ka jingkyrkhu kaba khraw ïa ki paidbah nongshong shnong ka thaiñ Muliang bad jong ki bynta jong ka West Khasi Hills kat kiba marjan sha ka thaiñ Nongstoiñ. Hynrei, naduh ba la shna haduh mynta ka dang long kumjuh bad ka dei ka surok kaba rit palat.
Ïa katei ka surok kaba naduh na Rwiang haduh Ktiehthawïar kaba jngai kumba 22 kilomitar, la pynbha bad siang rong naduh u snem 2011-12 ha ka por ba ka sorkar Meghalaya Progressive Alliance ba u (L) Dr Donkupar Roy u dang long kum u Myntri Rangbah ka jylla.
Katba na Ktiehthawïar sha Langja kaba don tang kumba ar kilomitar, ka la dei ka surok rong bad na Langja shaduh Mawthawkrah pat, la bteng da ka surok PMGSY kaba dang shu dep siang rong ha kine ki khyndiat snem ba la dep haduh Tynghor. Nalorkata ïa ka jingpynbha bad siang rong na Tynghor shaduh Athiabari pat dang shu pyndep ha u snem 2023.
Kum ban pynkynmaw ba ka jingpyndep ban siang rong ïa katei ka surok naduh Rwiang shaduh Athiabari, ka dei hadien ba ka sorkar pdeng ka la shimti ban pyntrei lyngba ka skhim PMGSY. Pynban, watla ïa katei ka surok la dep ban siang rong hynrei ka dang long pat ka surok kaba rit bad kaba khim bha.
Uwei na ki nongïalam shnong jong katei ka thaiñ, kata u bah B.Kharsyiemlieh u ba long ruh u sordar ka shnong Langja, u la ong ba ki paidbah ka thaiñ Muliang baroh, ki da angnud eh ba ka sorkar kan thaw ki lad ki lynti kumno ban pynheh biang ïa katei ka surok.
U bah Kharsyiemlieh u la ong ba katba nang mih ki sngi, ki kali kiba ïaid lyngba katei ka surok ki la nang bun bad nang roi katkum ka jingïaid jong ka por. Ki nongshong shnong naduh Athiabari shaneng haba ki leit donkam sha Nongstoiñ ki ïaid lyngba katei ka surok, namar ka kham jan ban ïa kaba leit lyngba ka Riangdo, ha kaba ka jingjngai na Rwiang sha Athiabari ka long tang sanphewwei kilomitar. Katba na Rwiang shaduh Athiabari ka jingjngai ka long haduh hynriewphew ar kilomitar.
U la ong ruh ba baroh ki paidbah nongshong shnong ka thaiñ Muliang, ki dei kiba im ha ka rep ka riang bad ka ïew Hahim bad Boko ha Assam ki dei ki ïew ki hat, ba ki paidbah ka thaiñ ki sngew trai bha namar ki dei kiba jan bha bad ka khaïi ka pateng jong ki nongrep ha kitei ki ïew ka dei kaba kongsan bha.
U la ong ba na hadien ba ki paidbah ka thaiñ ki la pynsngew na ka por sha ka por shaphang ka jingdonkam ban pynheh ïa katei ka surok, na ka liang ki rangbah shnong ka thaiñ ba kynthup naduh Athiabari ki la dep ban leit ïakynduh bunsien ha kine ki snem kiba la leit ïa u bah Prestone Tynsong Symbud Myntri Rangbah ka jylla, u ba bat ruh ïa ka tnad PWD ban pynsngew halor ka jingangnud jong ki paitbah.
Na ka liang jong u Symbud Myntri Rangbah u la kular ba un sa shimkhia bad u la ong ruh ba ka sorkar kan sa ïaleh katba lah ban thaw ki lad ki lynti na ka bynta ban pynurlong ïa ka jingangnud jong ki paidbah ka thaiñ. Hynrei, haduh mynta mynne ka kular kam poi shano shano ruh bad ka jingangnud ki paidbah ka shu kut noh.
