Rai ki Nongkyrshan ka NPP Ranikor Block Unit ban pynïeng ïa u Nelbi T. Sangma kum u Kyrtong MLA 2028

Mawkyrwat, Nailur 08: Ka National People’s Party (NPP), Ranikor Block Unit, hapoh ka jingïalam jong u Bah Kitborlang Nongrem, uba dei u Nongaibuid jong ka NPP Ranikor Block Unit, ka la pynlong ïa ka General Meeting ha Sohliwai Lake, Rangthong, South West Khasi Hills District.
Ha kane ka jingïalang, ki dkhot bad ki nongkyrshan jong ka party ki la ïoh ban ïatai bad pynsngew ïa ki mat bapher bapher kiba kynthup ïa ka report na ki Primary Unit, ka jingpynshai halor ka MP Election Shiteng Samoi kaba la khmih lynti ban long shen, kumjuh ruh ka jingpynkhreh bad jingïatai sani halor ka MLA Election ka ban long ha u snem 2028.
Ha kaba ïadei bad ka jingjied ïa u kyrtong ban ïakhun na ka Ranikor Constituency ha ka MLA Election 2028, ka General Meeting ka la shim ïa ka rai ban pynïeng ïa u Bah Nelbi T. Sangma kum u kyrtong jong ka NPP na Ranikor Constituency.
Ha kajuh ka por, la rai ruh ban ai jingkyrshan ïa u Bah Nelbi T. Sangma kum u President jong ka NPP Ranikor Block Unit. Kane ka rai ka pyni ïa ka jingiatylli bad ka jingshaniah jong ki nongkyrshan bad ki dkhot jong ka party ha u kyrtong na bynta ka elekshon MLA kaban sa long ha u snem 2028.
Haba kren ha ki lad pathai khubor hadien ba kut ka jingïalang, u bah Kitborlang Nongrem u la ong ba kane ka jingïalang ba la pynlong mynta ka sngi ka dei tang ka General Meeting hynrei phewse ki paidbah na kylleng ki Primary Unit kiba hapoh ka Ranikor Block Unit ki la ïa poi lang da ki hajar ngut. “Kane ka pynpaw ba ka NPP hapoh ka Ranikor Block Unit ka la nang khlaiñ haba ïa nujor bad ki ar snem lai snem kiba la leit noh”, ong u bah Nongrem.
Shuh shuh ula pynpaw ruh ba ka jinglum ïa kane ka jingïalang ka long tang ban ïoh sngew ïa ki jingtreikam jong ki Primary Unit bad jingïalang thuh paidbah bna pynkhreh ne pynkhlaiñ ïa ki nongkyrshan ha kane ka MP Elekshon Shiteng Samoi kaba dei jong ka Shillong Parliamentary Seat, pynban ka la mih paidbah pat ka jingtyrwa ïa u kyrtong jong ka MLA Elekshon 2028 ha kaba ki paidbah na kylleng ki Primary Unit ki la kyrshan pura ba dei ban phah beit ïa ka kyrteng jong u bah Nelbi T. Sangma u ban long u kyrtong ïa mon lang u ban sa ai reng ha u snem 2028 napoh ka Ranikor Constituency.
Kumta, khlem da buh kano kano ka jingrai da kumwei pat, ki la shim rai paidbah ban phah ïa ka kyrteng jong u bah Nelbi T. Sangma sha ka State Selection Committee jong ka NPP ba kin pynskhem.
Ha kane ka sngi la wan sakhi lang ruh da ki hajar ngut ki paidbah nongkyrshan jong ka Party NPP na ki 78 tylli ki Primary Unit jong ka NPP Ranikor Block Unit.