Nongpoh, Nailur 08: Kawei ka ïing ha ka shnong Umran Dairy ka la kem ding bad ingkhong khaid hynne ka step phyrngap bad ha kane ka jingjia, ym shym don satia kiba mynsaw, hynrei baroh ki tiar ki tar bad ki jingdon jingem kila ingkhong bad kylla dpei.
Katkum ka jingtip ba la lum, kane ka jingjia ka la jia ha ka por kumba 4 baje mynstep bad don tang uwei u khun shynrang uba la thiah ha katei ka iing hynrei u la kyndit noh ynda u la ïohi ïa ka ding ba ka la klang bha, bad mar mar u la khie bad kynthih na ka jingkhang iit ban mih napoh iing bad lait na ka jingmynsaw.
Ka ïing kaba la ingkhong khaid ka dei ka ïing jong ka Kong Bijenti Basaiawmoit.
Namar ka jingklang ka ding, ki paramarjan kiba la ïohi ïa ka jingjia ki la pyrshang ban leit ïarap mar mar. Hynrei, namar ka jingjur bad jingklang jong ka ding, kim shym la lah ban leh eiei shuh haduh ba ki pulit bad ki nongpynlip ding na ka Fire and Emergency Services ki la poi sha katei ka jaka ban ïakhun bad pynlip ïa ka ding.
Haduh mynta, ym pat lah ban pynshisha ïa ka daw tynrai jong kane ka jingjia. Hynrei la suba ba dei ka jingthud ka bording bad ka jingtohkit halor kane ka jingjia ka dang ïaid shakhmat.
