Pynlong ka ophis DSO-EJHD ïa ka Second Block Level -CM-YEP- ha Lumshnong Community Hall

Khliehriat Nailur 08: Ka ophis jong ka District Sports Officer, East Jaiñtia Hills District, ha ryngkat ka jingiatreilang bad ka ophis jong u Block Development Officer, Lumshnong C&RD Block, mynta ka sngi ka la pynlong ïa ka Second Block Level Chief Minister’s Youth Engagement Programme (CM-YEP) 2026, ïa kane ka prokram la pynlong ha Lumshnong Community Hall ha kaba la wan ban ïa don lang da ki khynnah skul, ki khun samla kiba na ki shnong bapher bapher kiba hap hapoh ka C&RD Block Lumshnong.
Kane ka Second Block Level Chief Minister’s Youth Engagement Programme (CM-YEP) 2026, ka don ka phang pdeng kaba ïadei bad ki samla ka “Young Meghalaya, Shaping Tomorrow” bad kane ka prokram ka don ka jingthmu ban pynlong ïa kane ka prokram kum ka rynsan ha kaba ki khun samla ki lah ban pynpaw pyrthei ïala ki jong ki sap ki phong ba ki don bad ruh kadei kata ka rynsan ka ban kyntiew ruh ïa ki sap ki phong, ka long ruh kum ka lad ha kaba ki samla ki ioh ban ïashimbynta ha ki bynta bapher bapher, ban kyntiew ïa kano kano ka kynhun, ban pynioh ïa ka jingsngew skhem bad ruh ban kyntiew ïa ka jinglong nongïalam.
Ka MDC jong ka Narpuh, ka kong D. Tongper ka la kren halor ka jingdonkam ban don kum kane ka rynsan kaban ailad ïa ki khun samla ba kin pynpaw pyrthei ïa ki sap ki phong, ka la ai mynsiem bad pynshlur ïa ki samla ba kin shim ïa kane ka lad bad ka kabu ban kyntiew ïa ki sap ba ki don, ka la ong ba da ka jingiashimbynta ha ki jingiakop kan iarap shibun ïa ki samla bad ïa ki khynnah skul ban kiew na kawei ka kyrdan sha kawei pat kum na ka District level sha ka State Level bad sha ka National level, ka la bynrap shuh shuh ruh da kaba ong ba ai ba ki sap ki phong kin ïa ïaid ryngkat-ryngkat bad ka lariti.
Ka MDC ka la pynshlur ïa ki khynnah skul ki dei ban sngewthuh ba ki hap ban iaid lyngba na kiba bun ki jingeh ban kiew shaphrang, kumta ka kyntu ba ki dei ban long kiba trei shitom, ban long kiba shimkhia bha haba pynkhreh ïa kano kano ka kam kaba kin leh ban dup ioh ïa ka u soh ka jingjop ha ka lawei, ka la kren ruh ba dei ban don ka jingngeit kaba skhem bad ka nongrim kaba skhem ban tei ïa ka lawei kaba phyrnai bad kaba donjingmut, ban long ruh kiba don ka akor ka burom.
Ha kaba kum kane ka sngi ba sdang ïa ka Second Block Level Chief Minister’s Youth Engagement Programme (CM-YEP) 2026, la pynphuh pynphieng ïa ka prokram da ki jingshad tynrai, solo flute, solo guitar, talent show bad la don ruh ka jingiakop bapher bapher kum ka jingiatan tyllai ne ka and tug-of-war bad kiwei kiwei, la wan ban iashimbynta shitrhem da ki samla na ka thaiñ, kaba kum kane ka prokram yn sa nang pynlong ruh ha kiwei kiwei ki jaka ha kaba mynta ka sngi 8 tarik bad 9 tarik yn pynlong ha Lumshnong Community Hall, ha ka 10 tarik bad 11 tarik yn pynlong ha Dkhiah West Community Hall bad ha ka 15 tarik bad 16 tarik yn pynlong ha Latyrke Community Hall.
Kiba la ïa don lang ha kane ka prokram ki kynthup ruh u Block Development Officer (BDO), Lumshnong C&RD block, u bah M. Kyndait, ka District Sports Officer (DSO), East Jaiñtia Hills District, ka kong S.M Rapsang, ki nongtrei na ka tnat Sport, ki nonghikai bad ki khynnah skul.