Sneng bad kyntu u Environment Secretary KSU CEC ïa ki nongïalam bad ki dkhot ka tnat KSU Mynkrem Unit

Khliehriat Nailur 08: U Environment Secretary KSU CEC, u samla Shiningstar Kharbihkhiew u la ai ki kyntien sneng kyntu ïa baroh ki dkhot bad ki nongkitkam jong ka seng ha ka jingïalang ba la pynlong mynta ka sngi ha shnong Mynkrem, kane ka dei ruh ka jingïalang ba la khot pynlong da ka KSU Laskeiñ Circle halor ka jingpynkha ïa kawei pat ka tnat treikam kaba tip kum ka KSU Mynkrem Unit.
U samla Shiningstar Kharbihkhiew u la kyntu ïa ki dkhot ka seng ba ki dei ban don ka jingiatreilang barabor bad ki nongïalam shnong ban wanrah ïa ka bha ka miat ha shnong ha thaw u la pynsngewthuh ruh ba kum ka seng kin nym pyrshah ïa kano kano kaba ka sorkar ka wanrah ïa ka jingmyntoi lyngba ka jingiatreilang bad ka shnong ka thaw ïa kaba dei na ka bynta ka jingbit jingbiang bad jingmyntoi ka shnong ka thaw hi baroh kawei, hynrei kaei kaba ka seng ka ieng pyrshah ha kine ki bnai ba ladep ka dei namar ba ka sorkar hi ka ïuhroit bad khñiot jubor ïa ka hok u paidbah bad dei na kane ka daw ba ka KSU ka mih shakhmat ban pyrshah ïa ka sorkar kaba pynthud ïa ka jingmyntoi u paitbah bad ïa ka jingshongsuk shongshngaiñ u paitbah. Shuh shuh kum u nongïalam, u la sneng, la kyntu ruh ïa ki khun samla kynthei bad shynrang ba ki dei ban kiar na ka shongkha khynnah hynrei ban shim ïa ka sienjam longkmie longkpa tat ynda haba la biang ka kam ka jam bad ka trei ka ktah namar ka jingshongkha khynnah ka dei kawei kaba pynhiar arsut ïa ka ri bad jaitbynriew jongngi.
U samla Pynshai Kupar Dkhar, uba bat kum u Information & Publicity Secretary KSU CEC, kren ha ka jingialang, u la ong ba ha ka pyrthei hi ki don lai kynhun ki jait briew, ka kynhun briew kaba nyngkong ka dei kita ki jait briew ka bym da bun paid, ka kynhun kaba ar ka dei ka kynhun ki jaitbriew kiba pynlong bad pynjia ïa kaei kaei kaba jia ne long ha ka imlang sahlang bad ka kynhun kaba lai ka dei kaba bun pait tam bad kane ka kynhun ka dei ka bym tip ïa kaei ka ban jia ha ka imlang ka sahlang, u la kyntu ba kum ka unit kaba thymmai jong ka seng ki dei ban don ha ka kynhun kaba iohi ïa kiei kiei ba jia bad kiba leh ruh ban pynbha.
Ïa ki nongkitkam bad ki dkhot lapynbam smai da u samla Shiningstar Kharbihkhiew, Environment Secretary KSU CEC bad ïa ka jingialang la pyniaid da u General Secretary KSU West Jaiñtia Hills District unit, u samla Leningrad Tariang, kiba la ai jingkren ki kynthup ruh u President KSU West Jaiñtia Hills District, Laitphar Syngkrem, u Finance Secretary KSU East Jaiñtia Hills District, samla Shaniahskhem Dkhar, u General Secretary ka KSU Jowai circle, u samla Nipoi Shadap bad na u waheh shnong jong ka shnong Mynkrem bad kiwei.