Yn buh mawnongrim u Vice President ka India ïa ki projek ba 1000 klur tam ha Meghalaya

Shillong, Nailur 05: U Vice President ka ri India u C P Radhakrishnan un wan jngoh kumba 2 sngi ïa ka jylla Meghalaya kaba dei ha ka 7 bad 8 tarik mynta u bnai, ha kaba ha kine ki sngi un sa buh ki maw nongrim ïa ki 5 tylli ki projek ba heh kiba shongdor T. 1,010.95 klur, ong ka khubor na ki heh sorkar.
Katkum ka kyrwoh khubor sorkar, baroh 5 tylli ki project jingtei la dep ban khot tender bad yn sa pyntrei ïa ki kam hapoh ki skhim bapher bapher jong ka sorkar pdeng.
Kaba heh tam napdeng kitei ki projek ki dei ka New Shillong Water Supply Scheme Phase-II (Part A) kaba ka jinglut ka long T. 850.58 klur, ka ban bei tyngka hapoh ka Urban Challenge Fund ka Ministry of Housing and Urban Affairs. Kane ka project ka thmu ban thaw ïa ka rukom sam um katkum ka juk mynta, ka jingsam um kaba biang na ka bynta ka New Shillong City bad ïa 32 tylli ki shnong kiba marjan kumba 24×7 kynta ka jingsam umbam umdih na ka bynta ki 4.34 lak ngut ki nongshong shnong. Kane kan wanrah ruh ïa ka rukom sam um kaba nyngkong eh ha jylla lyngba ka smart metering system bad kaba pynïasoh bad ka Integrated Command and Control Centre ban khmih lyngba ka por.
Kiwei pat ki projek ki dei ka jingtei ïa ka jingkieng kaba heh kaba 110-metre halor ka wah Umngot ha ka bynta ka surok Jongksha-Kharang-Dienglieng-Nongjrong-Moodymmai-Wahiajer ha ka jinglut kaba T. 21.86 klur hapoh ka NESIDS. Ka jingkieng kan long ka jingmyntoi ïa kumba 28,479 ngut ki paidbah ha kylleng ki 14 tylli ki shnong hapoh ka Mawkynrew Block bad ban pynbha ïa ka jingïaid lynti bad ka rung ka mih jong ki district hapdeng ka East Khasi Hills bad West Jaiñtia Hills, nalor ka jingthaw ïa ki surok bynrap kiba pynïasoh ïa ka surok hapdeng ka Shillong bad Jowai.
Napdeng kine ki projek kadei ruh ka surok kaba 13.50 km na Umsen sha Barapathar lyngba ka Pilangku-A, Jyrmang, Chibra bad Mawiong kaba shongdor T. 56.01 klur kaba hapoh ka NESIDS. Nangta ka surok kaba bha kaba ai jingmyntoi ïa kumba 5,705 ki briew ha kylleng ki 21 tylli ki shnong ha Jirang bad Umling Block ka Ri-Bhoi bad ban pynkhlaiñ ka jingïadei ka jingïasoh bad ka Assam.
Ha ka thup ki kynthup lang ïa ka jaka sumar kaba 30 jingthiah ka AYUSH facility ha Shillong Civil Hospital kaba ha ka jinglut T. 10 klur, ba bei tyngka da ka Ministry of Tribal Affairs hapoh ka Article 275(1). Ka G+2 facility kan pynbiang ki lad sumar kum ka Ayurveda, Homoeopathy, Yoga bad Naturopathy, Panchakarma, physiotherapy bad kiwei ki jingshakri.
Kiwei pat ki project ba hakhmat ki dei ka 2×50 MVA, 132/33 kV substation ha Mawkhanu da 132 kV double-circuit Saisiej-Mawkhanu line bad ka GIS bay ha Saisiej ha ka jinglut T. 72.50 klur hapoh ka PM-DevINE ban pynthikna ka jinglah ban pynneh ïa ka jingsam bording na ka bynta ka nongbah Shillong kaba thymmai.