La dang ïaid shakhmat ka jingshna ïa ka New Shillong Water Supply Scheme kynthup bun ki jingpyntrei

Shillong, Nailur 05: Ka jingtrei ïa ka bynta kaba nyngkong jong ka New Shillong Water Supply Scheme ka la ïaid shakhmat bad kane kan kynthup ka jingshna ïa ka dam um jaka ban buh ïa ki pom um bad ki jaka ban pynkhuid ïa ka um.
Ïa kane ka NSWSS la pynwan dur ïa ka ban pynbiang um ïa ka New Shillong Township kaba kynthup ïa ka Mawkhanu Knowledge City bad ban pynbiang um ïa ki 32 tylli ki shnong kiba don ha katei ka jaka kynthup ïa ki jaka pule bad ki ophis.
Ka sorkar ka la mang pisa T. 772.955 klur ban shna ïa kane ka jaka ring um ha ka bynta kaba nyngkong na katei ka pisa ba la mang, ka sorkar ka la siew T. 416.11 klur katkum ka jingtrei kaba la trei.