Ka jingpyrshah ïa ka Shillong Ropeway ka wan hadien ba ladep ïoh jingbit: Bah Paul Lyngdoh

Shillong, Risaw 15: U Myntri barim jong ka tnad Tourism ka sorkar jylla, u Bah Paul Lyngdoh, ha ka sngi Palei u la ong ba ka jingpyrshah ïa ka projek Shillong Ropeway ka mih hadien ba ki la dep ban ïoh lut ïa ki jingbit na ka bynta ban pyntyllun shakhmat ïa katei ka projek.
Haba kren bad ki lad pathai khubor, u Bah Paul u la ong ba kito kiba pyrshah ïa ka projek Shillong Ropeway ki dei ban pule bad bishar bniah ïa ki kot ki sla kiba ïadei bad kane ka projek shwa ban pynpaw ïa kino kino ki jingpyrshah.
U la ong ba ïa ki jingbit kiba ïadei bad ka mariang la pan bad ïoh naduh u snem 2022, ha ka por ba u dang long u dkhot jong ka District Council. Hadien kata, la ïoh ruh ïa ki jingbit na ka Ministry of Environment, Forest and Climate Change (MoEF), katkum ka jingong jong u.
U la bynrap ba na ka liang ki Dorbar Shnong kiba ïadei bad kane ka projek kim shym la pyrshah kynthup lang ïa u MLA jong ka thaiñ.
U Bah Paul u la buh jingkylli ïa ki kynhun kiba pynpaw ïa ka jingpyrshah mynta ha u snem 2026, da kaba ong ba ïa ki jingbit la dep ban ïoh naduh u snem 2022, bad ka projek ka lah ban ïaid shakhmat ha ki snem 2023, 2024 lane 2025.
U la pynkynmaw ruh ba ki jingbit kiba ïadei bad ka mariang ki dei ki sienjam kiba nyngkong eh kiba la shim ha u snem 2022, ha ka por ba um pat long satia u dkhot jong ka Ïingdorbar Thaw Aiñ ka Jylla.
U Bah Lyngdoh u la buh ruh jingkylli la u President ka Ri India un mynjur ban wan buh ïa u mawnongrim jong ka projek kaba, katkum ka jingsngew jong ki nongpyrshah, ka long pyrshah ïa ki nongrim ba kongsan jong ka jingpynneh pynsah ïa ka mariang, khamtam haba ka kyrteng jong u President ka don bynta ha kane ka sngi.