La rakhe ïa ka Sngi burom ki nonghikai kaba 65 ha Khliehriat EJHD

Khliehriat nailur 5: Ka Ophis jong u District School Education Officer (DSEO), East Jaiñtia Hills District mynta ka sngi ka la rakhe ïa ka sngi burom ki nonghikai kaba 65 lane ka 65th Teacher’s Day 2026 bad ïa ka prokram la pynlong ha Khliehriat Higher Secondary School.
U Deputy Commissioner, East Jaiñtia Hills District, u Manish Kumar, IAS, u la pynpaw ka jingsngew kmen bad sngew sarong ban ïa don bynta lang ha kane ka sngi ba dei ka sngi burom ki nonghikai, u la kren halor ka jingtrei shitom bad jinglen lade ki nonghikai kiba ai ïa ka jingnang jingstad ïa ki khynnah bad ong ruh ba ki nonghikai ki dei ka bynta kaba kongsan bad ba hakhmat eh ha ka imlang ka sahlang, namar ka bynta jong ki nonghikai ka phalang shabar na ka kamra klas ruh namar ki shim ruh ïa ka bynta kum ki kmie ki kpa ba ar jong ki khynnah, ki ialam lynti, ki khmih ïa ka long ka man jong ki khynnah.
U la kren ruh halor ka jingshem jong u ha ka mynnor jong ka jinglong khynnah skul ha kaba ïa ki nonghikai la kynmaw ym tang ha ki jingai jinghikai jong ki ha ki kamra klas, hynrei la kynmaw kyrpang ruh ïa ka dor ka jinglong nonghikai jong ki kaba ki ai jingnang jingstad ïa ki khynnah, ki pynshlur, ki ai mynsiem bad kaba kongsan eh ka jinghikai ba ki ai ban long kiba ryntih lane ban im ka jingim ba ryntih bad ba beit.
Ha kaba kum kane ka sngi, u Manish Kumar u la pynkynmaw ïa u syniang u bynhei jong u Dr. Sarvapalli Radhakrishnan,uba dei u President barim jong ka ri India, uba la long u nonghikai, u riew pyrkhat, u philosopher bad u briew uba paw bha.
Shuh shuh u la kren halor ka bynta kaba kongsan jong ki nonghikai ha kane ka juk stad kaba la kiew bha ka jingstad technology ha ka imlang ka sahlang, ha kaba ki khynnah ruh ki la kiew irat ha ka stad ka tip, u kyntu ïa ki nonghikai ba ki dei ruh ba ïalam ban hikai ïa ki khynnah ba kin tip kaei ka khana hamsaia bad kaei kaba shisha, kim dei ban shim tang ïa ka bynta ban hikai kot ha skul hynrei ban ïalam lynti ruh ïa ki khynnah sha kaba shisha bad hikai ban kin long ruh kita ki nongshong shnong kiba don ka jingkitkhlieh, u la bynrap ba ka jingsam ïa ka jingnang jingstad kam dei tang ban tei ïa ka jingim jong ki khynnah hynrei ban kyntiew ïa ka longbriew manbriew ban pynlong ïa ka jingim kaba dap da ka jingsuk jingkmen.
U Deputy Commissioner, Manish Kumar, u la kren ruh halor bun ki jingeh jong ki nonghikai ha kaba ïadei bad ki samla pule kiba ha kane ka juk khamtam kito kiba ngop ha u drok bad kito ki khynnah kiba la pep skul noh shiteng por, u kyntu lang ïa ki nonghikai bad ki khynnah skul ba ki dei ban sngewthuh ïa kaba sniew bad ban don ka jingiatreilang ban jop ïa ki jingeh ba ki samla ki iakynduh ban dup lah ban tei ne nohsyniang ban pynlong ne wanrah ïa ka jingim kaba don jingkyrmen, kaba dap da ka jingkmen ha ka imlang ka sahlang.
Ha ka jingdon bad synran lang u District School Education Officer (DSEO), East Jaiñtia Hills District, u Deputy Commissioner, East Jaiñtia Hills District, u Manish Kumar, IAS, u la pynkupburom ïa kiba ioh khur ïa ki khusnam namar ki jingnohsynaing jong ki ha ka jylli jong ka pule puthi bad kiba ioh ïa kane ka khusnam ki kynthup u Principal, Topcem Public School, Campus Meghalaya Cement Ltd. u Sumant Kumar bad ka Head Teacher, Khliehriat West Government L.P. School, ka kong Nazariness Nongtdu, katba ïa ka khusnam jong ka State Awardee na East Jaiñtia Hills District la ai sha ka kong Respilda Phawa, kaba dei ka Head Teacher jong ka Mukhaialong Memorial L.P School.
La pynphuh pynphieng shih shuh ïa ka prokram da ki jingshad tynrai, ki jingrwai na ki khynnah skul kiba na ki skul bapher bapher na East Jaiñtia Hills District.
Nalor u Deputy Commissiopnre, la ïa don ryngkat lang ruh u District School Education Officer (DSEO), East Jaiñtia Hills District, u bah R. Diengdoh, u Sub-Divisional School Education Officer (SDSEO), East Jaiñtia Hills District, u bah Onikson Sumer, ki heh sorkar na ka tnat Education, ki nonghikai, ki khynnah skul, ki khynnah NCC, Scouts & Guide bad kiwei kiwei.