Shillong, Nailur 5 : U Adviser jongka tnad Social Welfare ka sorkar jylla bad u Nongïalam ka UDP u bah Paul Lyngdoh mynta ka Sngi Saitjaiñ u la ong ka sorkar ka pyndonkam lut ïa baroh lang bad da baroh ki lad ki lynti ban ïakhun pyrshah ïa u drok ha ka jylla.
U la ong ba ka long ka sien ba nyngkong eh ba ka tnad Social Welfare kan ïatrei lang ym tang bad ki Dorbar Shnong hynrei ka la rung ruh sha ki jaka pule puthi ban pynsngewthuh ïa ka jingsniew jong u drok.
Nalor kata ka sorkar ka la ïatrei lang ruh bad baroh ki Kynhun Balang, ki Niam bapher bapher, ki kynhun seng bhalang bad ki paid nongshong shnong hi. Kine ki jingïoh kem, ïoh kurup drok bad ïoh jingtip shaphang u drok ka dei na kane ka daw ka jingïatrei lang jong baroh lang.
Nalor kane ka sorkar ka ïatrei bor bah bad ki seng bhalang ban rat dyngkong ïa u drok napoh ka jylla.
