Shillong, Nailur 03: Ka Sawmer ka la wanphai na ka shi kol ban pynliem ïa ka Nangkiew Irat da 2-1 ha ka Shillong Premier League 2026 hynne ka sngi Palei ha SSA Stadium.
U Ronaldkydon L Nonglait (38’) u la thep ïa ka kol kaba nyngkong jong ka Nangkiew Irat shuwa ba ka Sawmer kan wanphai da ar tylli ki kol na u Khrawkupar Tamu (70’) bad u Andy Mawthoh (75’).
Ka Nangkiew Irat ka la rung sha kane ka jingïakhun da ar tylli ki namjop ha ki jingïalehkai ba la dep bad ka thmu ban jop lai sien lynter. Ki la ïoh katto katne ki kabu kiba la shu sepei shuwa ban ïoh pynkhihjar, hadien ba u nongapkol ka Sawmer u Pyrshangbanbha Dkhar um shym la lah ban tehlakam ïa ka jingpyrshang jong u Ronald. Kane ka kol kadei kaba 50 jong ka SPL mynta u snem 2026.
Katei ka shi kol ka la paw kumba ka la biang na ka bynta ka Nangkiew Irat ban khur ïa ka jingjop, hynrei ka Sawmer ka la khie im biang ha ki 20 minit ba dang sah jong ka kylla miet, ha kaba u Khrawkupar u la pynïakhaid ha ka minit kaba 70 shuwa ba u Andy un thep ïa ka namtam ban rai ïa ka jingjop.
Kane ka dei ka sien kaba nyngkong ha ki hynriew tylli ki jingïalehkai ba ladep ba ka kynhun kan wanphai wat hadien ba shah lamkhmat ban khur ïa ka jingjop. Kane ka resol ka la wanrah katto katne ki jingkylla ha ka miej kheiñ point, ha kaba ka Sawmer (6 point) ka la kiew sha ka kyrdan ba hynriew, kaba pynlong ïa ka Nongkseh (4 point) ban hiar sha ka kyrdan ba hynñiew.
Ka jingshah rem ka la pynlong ruh ïa ka Nangkiew Irat ban duh ïa ka kyrdan ba saw ha ka Meghalaya Police. Baroh ar ki ïaryngkat mar 7 point, bad shuwa kane, ka Nangkiew ka don ïa ka jingïapher kol kaba kham bun (goal difference) hynrei kane ruh ka la ïaryngkat mynta da mar +1. Hynrei ka MLP ka la thep kham bun kol, (7 la 5) kaba pynlong ïa ka ban bat ïa ka kyrdan ba saw ha ka miej.
Mynta ka SPL 2026 kan sangeh shipor bad kan wanphai biang ha ka 09 tarik Nailur ha kaba ka Mylliem kaba don ha trai duh kan ïakhun pyrshah ïa ka Shillong Lajong kaba wan ba-ar ha ka por 3:40 baje nohphai sngi.
