Shillong, Nailur 03: Ka Meghalaya ka la mad ïa ka jingjop kaba suk da 3-0 pyrshah ïa ka Maharashtra ha ka jingïakhun kaba ar jong ka Group C ha ka lympung Junior Boys National Football Championship 2026-27 (Tier 1) na ka bynta ka Dr BC Roy Trophy ha Bengaluru hynne ka sngi Palei.
U Playerson Jitem Syiemlieh, Coach jong ka kynhun, um shym la wanrah kano kano ka jingkylla ha ka kynhun kaba sdang na ka jingïakhun ba ka Meghalaya ka la jop da 2-1 pyrshah ïa ka Tamil Nadu ha ka sngi Ba-ar.
Ka kol kaba nyngkong ka la urlong ha ka minit kaba 18 lyngba u Adriel B Nongbet, kaba pynlong ïa ka jylla ba kan lamkhmat da 1-0 ha kaba kut jong ka kylla step.
Tang 2 minit haba jam sha ka kylla miet ka Meghalaya ka la ïohlad ban pynjlan ar shah ïa ka kol lamkhmat, bad sa shi sien ïa kane ka kol la thep da u Adriel (47′), kaba dei artad ka kol kaba lai jong u ha kane ka lympung.
Ka Meghalaya ka la pynskhem ïa ka jingjop khlem jingartatien hadien ba u Habankhlur Lyngdoh Mawnai, u la thep ïa ka kol kaba lai ha ka minit kaba 52.
Ka Meghalaya kan ïakhun ïa ka jingïalehkai group stage ba khatduh jong ka pyrshah ïa ka Mizoram ha ka sngi Saitjaiñ ha ka por 8:15 baje mynstep. Hadien ba ka la pynliem kput haduh 7-0 ïa ka Tamil Nadu ha ka jingïalehkai kham hashwa hynne ka sngi Palei, ka Mizoram ka la ïoh 6 poiñ, kaba ïakhaid bad ka Meghalaya, hynrei ka Mizoram ka lamkhmat da ka jingïapher kol kaba kham bun (da +9 la +4). Kumta ka Meghalaya kan donkam ban jop ha kane ka sngi Saitjaiñ khnang ban ïoh jaka ha ka semifinal namar tang ka kynhun kaba wan ha khlieh duh na kawei pa kawei ka Group kin ïohrung sha ka wat ïakhun knockout.
Ka thup kynhun jong ka Meghalaya na ka bynta kane ka jingïakhun ki long:
Alvin Kharbani (GK), Shanborlang Khongjee (sub Damang Kynsai Marbaniang 87′), Franky Kharkrang, Samuel Malieh (sub Habankara Blah 87′), Wallambok Thongni, Pyrkhatlang Marbaniang, Andrew Kharsati (sub Mangpaka Nongkynrih 82′), Aibannangkhraw Kharumnuid, Adriel B Nongbet (sub Seibok Lyngdoh 73′), Aiborlang Mulieh (sub Skhemlang Marthong 73′), Habankhlur Lyngdoh Mawnai.
