Shillong, Nailur 03: Ka lympung phutbol Second Division 2026 jong ka Shillong Sports Association ka la jam sha ka Quarter final ban sdang naduh mynta ka sngi Thohdieng.
Baroh hynriew tylli ki kynhun ba pyndep kyrdan ba nyngkong bad ba-ar ha la ki jong ki Group ki la ïohrung sha ka QF; kine ki kynthup ïa ka Mawpat SC bad Madan SCC (Group A), ka Umlyngka SC bad Mawryngkneng SC (Group B), ka Lawsohtun SC bad ka Tynring (Group C). Ka Sohryngkham SC (Group C) bad ka Smit SC (Group B) ki la ïasoh lang kum ki ar tylli ki kynhun kyrdan ba lai kiba kham kynsai.
Ka Quarter Final ba nyngkong ha kane ka sngi Thohdieng kan long hapdeng ka Mawpat SC pyrshah ïa ka Tynring SC, ha ka por 3:15 baje nohphai sngi ha SSA Stadium.
Ki don ruh lai tylli ki kynhun kiba hap ban ïakhun ïa ka Relegation zone ban lait na ka jingshah pynhiar kyrdan. Kine ki long ka Lumshyiap (Group A), Mawkriah West (Group B) bad ka Jongksha (Group C), hadien ba baroh lai ki la pyndep sha trai duh ha la ki jong ki Group.
Kin hap ban ïakhun markylliang kawei ïa kawei pat, ha kaba ka kynhun kaba kynsai tam kan lait na ka jingshah pynhiar kyrdan, katba ki ar tylli kiwei pat kin hiar sha ka Third Division ha ka samoi ban wan.
Ka jingïalehkai relegation zone ba nyngkong kan long hapdeng ka Lumshyiap SC pyrshah ïa ka Jongksha SC ha ka por 1 baje mynsngi. ïa ka relegation zone yn pynlong ha MFA Ground.
