Ioh jinghikai bad jingmyntoi kumba 50 ngut ki nongri dohkha, sam jingbam dohkha kumba 5 hajar kilo

Nongpoh, Nailur 02: Ka ICAR-Central Institute of Freshwater Aquaculture (ICAR-CIFA), Bhubaneswar, ha ka jingïatreilang bad ka Department of Fisheries, ka sorkar Meghalaya, ka la pynlong ïa ka One-Day Training bad Distribution of Critical Input (Formulated Fish Feed) Programme mynta ka sngi ha ka ophis jong ka Superintendent of Fisheries, Nongpoh, Ri-Bhoi District.
Ïa kane ka prokram la pynlong hapoh ka ICAR-CIFA North Eastern Hill (NEH) Region, da ka thong ban kyntiew ïa ka jingri dohkha, bad ka ïohkam ïohjam jong ki nongrep dohkha ha ka thaiñ Shatei Lam Mihngi.
Ki don kumba 50 ngut ki nongrep dohkha kiba la shah jied kum ki nongïoh jingïarap na kane ka prokram. Kine ki kynthup ïa ki nongrep kiba la ïoh jingïarap ïa ki Solar-Powered Aerators na ka bor district ha u snem 2025, ban pyndonkam ha ki pung ri dohkha jong ki.
U Dr. Subhendu Adhikari, Principal Scientist, Scientist-in-Charge bad NEH Coordinator, ICAR-CIFA, u la long u Resource Person ba kongsan ha kane ka sngi ban ai jinghikai.
Ïa kane ka sienjam la lah ban pynlong lyngba ka jingïatreilang bad ka jingïalam jong u Dr. Pramoda Kumar Sahoo, Head bad Director, ICAR-CIFA, bad ka Dr. Rezina Ch. Marak, Director of Fisheries, Government of Meghalaya.
La pynshai bñiah ruh ïa ki nongrep halor ka jingdonkam ban pyndonkam ïaki symbai dohkha bad ka bam dohkha kiba bha, ban kyntiew ïa ka jingmih dohkha ha ki pung bad ruh kumno ki rukom ai bam dohkha kiba katkum ka juk stad saïan bad sumar ïa ki pung dohkha.
Ha kane ka prokram, la sam haduh 5,000 kilo ki jingbam dohkha sha ki 50 ngut ki nongrep dohkha kiba la shah jied.
Kane ka sienjam ka wanrah ïa ka jingïatreilang kaba kham skhem hapdeng ka ICAR-CIFA bad ka tnad Fisheries, ka sorkar Meghalaya, ban pynbiang ïa ka jingtip, ka jingïarap sha ki nongrep dohkha, da ka thong ban kyntiew ïa ka kam ri dohkha haka thaiñ.