Shillong, Nailur 01: Ki bor pynïaid ka Sohra Sub Division ha ka kyrwoh khubor ki la pynbna ban khang ïa ka ïaid ka ïeng jong ki kali ha Sohra ha ka step jong ka 4 tarik u Nailur namar ka jingdon ka 5th Sohra International Half Marathon ha katei ka sngi.
Katkum ka jingpynbna paidbah ba la pynmih da u Sub Divisional Officer (Civil), Sohra ha ka sngi Ba-ar, ka leit ka wan jong ki kali yn khang naduh ka por 4:30 baje mynstep haduh 10:00 baje mynstep ha ka surok Shillong-Sohra na Mawkdok lyngba ka Laitsohpliah, Mawkma, Laitmawsiang bad Laitryngew, nalor ki bynta ka lad sha Dainthlen, Khliehshnong sha Sohra, surok Laitkynsew-Sohra lyngba ka surok Mawmluh bad na surok Lad Sohbar-Sohra.
Ha ka kyrwoh khubor, ki bor pynïaid ki la ai jingmut ïa ki nongjngohkai pyrthei bad ki nongleit nongwan ba kin pyrkhat lypa bha ïa ka jingleit jingwan jong ki katkum kane ka por khnang ban lait na ka jingeh, katba ïa ki jingshakri ba kyrkieh kynthup ïa ki kali kit nongpang bad ki kali pynlip ding yn lait na katei ka jingkhang ba la pynbna ha ka khubor.