Shillong, Nailur 1: Ka ïing Bishar ka Special Judge (POCSO) ka East Khasi Hills, Kong MK Lyngdoh, kala hukum ban set phatok haduh 30 snem ïa u Kpanah uba leh beijot ïa la ka jong ka khun ruit ba dang knynnah ka rta.
Kat kum ka kyrwoh ki pulit, ïa ka ejahar halor kane ka jingjia la ujor ha ka 7 tarik Nohprah, 2020 ha Mawngap police station kaba la lam sha ka jingkem ïa u Teren Mawlieh.ïa kane ka case la tohkit da ka WPSI L. Kharjana jong ka Women PS.
Ha ka 28 tarik Nailar, ka ïing Bishar kala pynshisha ba u Teren Mawlieh ula leh ïa kane ka kam bymman kaba la pynhap hapoh ka Special POCSO case No. 06 jong u snem 2021 kaba mih na ka Mawngap PS Case No. 49(12)2020.
Ka ïing Bishar ka la rai pynrem ïa u da kaba set phatok 20 snem halor ki kam runar katkum ka kyndon 4 jong ka POCSO Act, 30 snem RI ïa ka kam runar katkum ka kyndon 6 ka POCSO, 5 snem ïa ka kam runar katkum ka kyndon 8 bad 7 snem ïa ka kam runar katkum ka kyndon 10, ryngkat ka kuna kaba kot sha ka 1 lak tyngka.
Ki pulit ki la ïathuh ba utei u nongleh bymman u la dep ban shah set phatok 3 snem 11 bnai bad 16 sngi, bad un hap ban shah set phatok sa 26 snem bad 2 sngi.
