Shillong, Nailur 01: Ka ophis Deputy Commissioner East Khasi Hills District ka la pynbna ba la pynlait ïa ka Action Plan for Elimination of Dog mediated Rabies, ka Pilot project kaba sdang na ka thaiñ Laban.
Ïa kane ka rukom pyrkhat treikam la plie da u Deputy Commissioner u Abhilash Baranwal IAS DC East Khasi Hills District, ha ka jingïadonlang u Additional Deputy Commissioner u Bah Ferdinand Basan bad ka District Veterinary Officer ka Dr. Nina Marbaniang.
Ka jingthmu jong kane ka prokram ka long ban ai injek ïa ki ksew surok bad kumjuh ruh na ka bynta ki ksew kiba ri ha Ïing.
Haba kren ha kane ka sngi u DC ka East Khasi Hills u la ïathuh ba ïa kane la sdang shwa na ka thaiñ Laban baroh kawei naba la lap ba bun na ki ksew surok ki kham bun sha kane ka thaiñ.
U la ïathuh ruh ba ha kane ka rukom treikam kaba thymmai kadei ruh kaba la leh ha baroh kawei ka ri bad kumta la sdang ïa kane ka Project ha East Khasi Hills.
Ha kane ka Project la bthah ïa ki bor pynïaid shnong ban ithuh noh ïa ki jaka ba kyrpang na ka bynta ban ai jingbam ïa ki ksew surok naba mynta ym lah shuh ban shu ai bam kat haba lap.
Haba ong ka District ha kine ki 8 bnai ba la dep la don kumba 7 hajar ngut kiba la shah dait ksew, bad ha ki 3 snem ka la poi kumba 10 hajar ngut bad ba la shim noh ruh ïa ka jingim ki 3 ngut ki briew naba ki shah dait ksew ba don bih rabbies, kumta la hukum ruh ïa ki trai nongri ksew ban kitkhlieh bad wah ki dak jingthoh hakhmat khyrdop haba ri ksew khamtam kiba long beaiñ kum ki ksew pitbull, Rottweiler, German Shepherd bad Doberman bad ki bym dei ki jingri na ki shnong.
U la ïathuh ba ki briew ki don ka hok ban ujor ejahar ïa ki nongri ksew lada shah dait bad ba pynkheiñ ki kyndon.
U la kyntu ïa ki nong shong shnong ban ïatreilang bad ki nongsynshar shnong, ki pulit bad khamtam na ka tnat ri jingri halor kane ka kam.
Na ka liang u ADC pat u la ïathuh ia ka jingthmu ba kongsan kane ka pilot project bad baroh ki kyndon ba dei ban bud, katba ka Dr. Nina Marbaniang pat ka batai halor ki jingai vaccine ei ïa ki mrad ba ri ha ki Ïing khnang ban pynduna na ka jingma kiba long kiba ïap lada ym don jingkitkhlieh.
La ong ruh kane ka jingai vaccine ka ïaid lang ryngkat bad ka jingleh sterilized ïa ki ksew surok ban pynduna ïa ka jingkharoi ki ksew surok.
Haba pynshai shuh shuh halor kane na ka liang u ADC u Bah F Basan u la ong ba na ki 2,823 tylli Case shah dait ksew la ïoh lum jingtip naduh u bnai Kyllalyngkot haduh Naitung 2026, bad 80% percent ki Case dei ki na ki ksew ba ri ha ïing.
U la ong, “Kane ka long kaba sngew shyrkhei. Lada ngi leh ïa ka jingkheiñ man la u snem, kan long palat 5,000 ngut ki briew kiba shah dait ksew ha ka shisnem.”
U Bah Basan u la ong ba ka hukum kaba treikam naduh mynta ka sngi bad la pynmih 11 tylli ki jingbthah ba ki Dorbar Shnong ki don ka bynta ban leh kynthup ïa ka jinglum jingkheiñ ïa ki kdew, ban pynsuk ïa ka jingai tika ïa ki ksew ïaid lamwir bad kiba ri ha ïing, ban ithuh ïa ki jaka ai bam bad ban sangeh noh ïa ka jingai bam thurmur ïa ki ksew.
U la ong ba ki briew ba ri ïa ki ksew kum Pitbull, Rottweiler, German Shepherd bad Doberman ki dei ban shim khia ha ka por ba ki ïalam kai ïa ki ksew ba kam dei don ka jingshah dait ïa ki briew, ki trai ba ri ksew kidei ban buh ki jingpynbna ha ki ïing ki sem, ban pynthikna ïa ka jingpynkhuid ïa ki jaboh, bad ban pyntip sha ki bor Pulit lada don ka jingshah dait ksew.
“La ai bor ïa ki Dorbar Shnong ban ujor FIR pyrshah ïa ki bym bud ryntih ïa ki kyndon bad ban daiñ kuna ruh ïa kiba pynkheiñ ïa ki kyndon,” ula bynrap.
U la ïathuh ruh ba ki bor pynïaid distrik ki la buh ka thong ban pynduh noh ïa kane ka jingpang rabies ki ksew hapoh u snem 2030.
