Shillong, Naitung 28 : Ka Hynñiewtrep Achik National Movement (HANM) lyngba u President ba rangbah jong ka seng Bah Lamphrang Kharbani ka la noh synñiang da ki jersey ïalehkai football sha ka Kut Sports Club.
Ïa kitei ki jersey u Bah Lamphrang Kharbani u la aiti sha ki nongkitkam jong ka Kut Sports Club ha ka jingïalang pynskhem ïa ka seng HANM Mawryngkneng Circle ha ka sngi Balang ha ka shnong Kut.
U Bah Lamphrang Kharbani haba ai jingkren u la ong ba ka jingnoh synñiang da ki jersey ka long shi bynta ban ai mynsiem bad nang pynshlur ïa ki samla kiba don ka sap ïalehkai bad u la kyntu ruh ba ïa ki nongkitkam jong ka sports club ha kajuh ka por kiba dei ruh ki nongkitkam ka HANM Mawryngkneng Circle ba kin nang trei shitom ban kyntiew ïa ki kam ïalehkai ha katei ka thaiñ.
Na ka liang ki nongkitkam ka Sport Club ki la pynpaw ka jingsngewnguh bad kyrkhu kyrdoh ïa ka seng HANM hapoh ka jingïalam u Bah Lamphrang Kharbani ba kan nang ïai kiew shaphrang ha ki liang baroh.
