Shillong, Nailar 28: Ka All Meghalaya Karate-Do Association (AMKA) ka dap da ka jingsngew sarong ban pynbna ba u wei na ki nongïalehkai karate ka jylla, kata u Gideon Tympuin, u la shah jied ban mihkhmat ïa ka India ha ka 24th Asian Karate Federation Cadet, Junior & U-21 Karate Championships 2026, ka ban long ha Amman, Jordan, ha u bnai ban wan.
Kane ka lympung kan long naduh ka 06 tarik haduh ka 11 tarik Nailur, bad u Gideon un ïashim bynta ha ka men’s kata jong ka kyrdan ïalehkai U-21.
U Gideon u la shah jied hadien ka jingïalehkai kaba seisoh ban khur ïa ka takma ksiar ha ka 5th KIO Senior and U-21 National Karate Championship 2026, kaba la long ha New Delhi, naduh ka 26 tarik Rymphang haduh ka 01 tarik Lber.
Ban bynrap shuh ïa kane ka jingjop, u Gideon u la ïoh ruh ban khur ïa ka takma rnong ha ka 10th Cadet, Junior, U-21 & Senior South Asian Karate Championship 2026, kaba la long ha Dhaka, Bangladesh, ha ka 15-19 tarik Naitung.
“Ka jingshah jied jong u ha ka kynhun India ka long ka jingsarong bad ka khyllipmat kaba kongsan na ka bynta ka Meghalaya bad ka kynhun karate baroh kawei jong ka jylla,” la pynpaw ka AMKA ha ka kyrwoh khubor hynne ka sngi.
“Ka All Meghalaya Karate-Do Association ka ai khublei ïa u Gideon halor kane bad kitbok kitrwiang ïa u katba u dang mihkhmat ïa ka ri India ha ka rynsan ïakop bar ri (international stage)”.
U Gideon un khreh ban leit sha Jordan ha ka 04 tarik Nailur, 2026.
