Ka jingshlei um bad ki bor mariang ha Nepal ka dak ïa ka Meghalaya ban long lypa kaba la pynkhreh : Dr. Mukul Sangma

Shillong, Nailar 27 : U Nongïalam ka Liang Pyrshah ha Iing Dorbar Thawain ka Jylla, Dr. Mukul Sangma, ha ka Sngi Palei, u la ong ba ki jingshlei um bad kiwei pat ki jingwan lyngshop ka mariang kiba la jia ha Nepal, Uttarakhand, Himachal Pradesh bad Assam dang shen ki dei ban long ka jingmaham ïa ka Meghalaya ba ka dei ban long kaba la pynkhreh.
Haba kren bad ki lad pathai khubor, u Dr. Mukul u la pynkynmaw ïa ka Disaster Management Act, 2005, kaba la thaw hadien ka jingïasyllok kaba jylliew hadien ki jingjia kiba khraw, kynthup ïa ka jumai bah ha u snem 1897.
“Ka Act ka ai ïa ki jingshemphang shaphang kumno ka thaiñ ka lah ban shah ktah lada kum katei ka jingjia ba sniew ka jia biang. Ka pynbor ban don ïa ka Comprehensive Disaster Management Plan ha ka kyrdan jong ka sorkar pdeng bad ruh ha ka sorkar jylla,” u la ong.
Shuh shuh u la ong ruh ba ka Meghalaya ka la pdiang ïa ka State Disaster Management Plan kaba don ïa ka rukom treikam kaba skhem, kata ka District Authority kaba la khlieh da u Deputy Commissioner, ka State Authority kaba la khlieh da u Chief Minister, bad ka Executive Committee kaba la khlieh da u Chief Secretary ha ryngkat ka jingïashim bynta jong baroh ki tnad bapher bapher.
“Man ba ngi pynkhreh ïa kano kano ki prokram kam pynroi, kine ki bynta baroh ki dei ban kheiñ lang, khnang ba kano kano ka jingtei kaba la thaw kan long kaba lah ban ïeng pyrshah ïa ki jingjia ba sniew,” u la ong.
U Dr. Mukul Sangma u la ong ba ki kyndon ban tei jingtei na bynta ki jylla lum kum ka Meghalaya ki dei ban kynthup ïa ka jinglah ban shan ïa ki bor ka mariang bad ki DPR ki dei ban da bishar bniah shwa ban ai jingmynjur.
Haba kdew ïa ka jingroi sted ha ki nongbah haduh ban da khanglad noh ïa ka lynti ïaid jong ka um, u Dr.Mukul u la ong ba kine ki dei ka daw ka jingshlei um ha Gurugram bad ruh ha Guwahati.
“Ym lah ban ïaleh pyrshah ïa ka mariang. Ha Guwahati, ka wah Brahmaputra kaba khraw ka tuid ha ka liang shatei bad ki lum ki don ha ka liang shathie. Ka um kan tuid sha ki jaka kiba kham duna ka jingjrong lyngba ka bor tan. Ki lynti um ba la don lypa la ka long ha ki wah rit ne ki wah heh, ki dei ki lynti tynrai jong ka um ha ka por slap,” u la ong.
Haba kdew ba ka Meghalaya ka dei ka jylla kaba ïoh slap bun tam, u la ong ba ka jylla ka mad ïa ka jingkylla jong ka suiñbneng bad ki bor jong ka mariang namar ka jingkylla ka suinbneng kumba la sakhi ha Garo Hills ha u snem 2014 bad dang shen ha Uttarakhand bad Nepal.
“Ka dei ban don ka jingbishar bniah kaba kham jylliew ïa ki rukom treikam jong ngi. Ngi dei ban trei da ka jingpyndonkam da ka juk stad bad ruh da ka jingshemphang bad kynthup lang ïa ki riew shemphang nalor ki nongthaw ain,” u la bynrap biang.