Ki Elector kiba don jingduna ha ka Mapping, la kyntu ba kin pynbiang ïa ki kot ki sla na ka bynta ka SIR 2026
Mawkyrwat, ‘Nailar 25: Ka ophis u Deputy Commissioner (Election), South West Khasi Hills District, Mawkyrwat, ka pyntip sha baroh ki Elector hapoh ka distrik ba, na ka bynta ban pynthikna ïa ka jingpyntreikam kaba ïaid beit bad kaba seisoh jong ka Special Intensive Revision (SIR) 2026, ki Elector kiba ym pat don ka mapping ne kiba don jingbakla ha ka mapping ki dei ban pynbiang ïa kano kano kawei na ki 12 tylli ki kot ki sla kiba la kdew da ka Election Commission.
Ka ophis ka la pynshai ba kane ka thup jong ki kot ki sla ka dei tang ka thup kaba la kdew bad kam long kaba kut. Ki Elector kiba ym don satia ïa kano kano na ki kot ki sla ba la kdew, la kyntu ban ïakynduh ïa ki tnad treikam ne ki bor ba dei peit ba kin ïoh jingïarap ban pynïoh ïa ki kot ki sla kiba donkam.
Namarkata, ki 12 tylli ki kot ki sla kiba la kdew ki long : ka Identity Card ne Pension Payment Order ba la ai sha ki nongtrei ba pura ne ki nongïoh penshon jong ka Sorkar Pdeng, Sorkar Jylla ne Public Sector Undertaking (PSU), kano kano ka Identity Card, Certificate ne Document ba la pynmih hapoh India da ka Sorkar, ki bor pynïaid shnong, ki Bank, Post Office, LIC ne PSU shuwa ka 1 tarik Naitung, 1987, ka Birth Certificate ba la ai da ka bor ba dei peit, ka Passport.
Nangta, ka Matriculation/Educational Certificate ba la pynmih da ka Board ne University kaba la ithuh, ka Permanent Residence Certificate ba la ai da ka bor ba dei peit jong ka Sorkar Jylla, ka Forest Rights Certificate, ka OBC/SC/ST ne kano kano kawei pat ka Caste Certificate ba la pynmih da ka bor ba dei peit.
Ka National Register of Citizens (NRC), ha ki jaka ba ka don, ka Family Register ba la pynkhreh da ka Sorkar Jylla ne ki bor pynïaid shnong, ka kano kano ka Land ne House Allotment Certificate ba la ai da ka Sorkar bad ha kaba ïadei bad ka Aadhaar, yn pyntreikam katkum ki jingbthah jong ka Election Commission lyngba ka Letter No. 23/2025-ERS/Vol. II dated September 9, 2025 (Annexure II).
Kumta, ka District Election Office ka la kyntu ïa baroh ki Elector kiba don bynta ba kin ïatreilang bad ka ophis bad ban pynbiang ïa ki kot ki sla kiba donkam, khnang ban pynsuk bad pynthikna ïa ka jingpyntreikam kaba ïaid beit, kaba seisoh bad kaba ryntih jong ka SIR 2026 hapoh ka South West Khasi Hills District baroh kawei.