Khapngiah haduh katno ha Shillong, hap ban rah ïa ki nongïalam KSU sha Garo? Kylli ka longkmie

Nongpoh, Nailar 24: Kum ka jingpynshai shuh shuh sha ki paidbah halor ki san tylli ki mat dawa jong ka seng naka sorkar ba kadei ban pynurlong noh, ka seng Khasi Student Union (KSU) mynta ka sngi kala leit ban sam da ki kot lyngkdop sha ki paidbah haki jaka iew bapher bapher ka them Ri-Bhoi bad khamtam ban pan ka jingkyrshan naki paidbah.
Kitei ki 5 tylli ki mat dawa ka seng ki kynthup ba dei ban pynduh pyndam noh ïaka Public Hearing jong ka Shree Cement bad ka jingtohkit kaba laitluid, kaba ar ka dei ban pynurlong noh ïaka Meghalaya Residents Safety & Security Act, 2016, katba ym pat ioh ïaka ILP.
Ka jingdawa ba lai ka dei ban pynurlong noh ïaka jingpynkylla ïaka Meghalaya Identification, Registration (Safety & Security) of Migrant Workers Act, 2020, kaba saw ka dei ban pynbeit noh ïaki jingeh haka rukom thungkam ha NEIGRIHMS bad ailad kaba hok ïaki samla ka jylla, bad kaba khatduh ka long ban thungkam da kaba shai bad kaba hok da kaba pynduh noh ïaka Personal Interview, wanrah jingkylla haka MPSC bad DSC, thaw ïaka SOP naka bynta kiwei pat ki bor thungkam.
Ha katei ka jingleit sam kot lyngkdop ka KSU sha ki paidbah khamtam ki nongshong iew bun naki paidbah kila ai ka jingkyrshan ba pura ïaka seng KSU namar kitei ki mat dawa jong ka seng ki dei shisha kiba donkam naka bynta ki khun ki kti bad ki khun samla ka jylla khamtam ka lawei jong ka jylla hi baroh kawei.
Katto katne ki longkmie nong shong iew kila ong ba kum ki nongshong iew hi kyrshan pura ïaka KSU bad lada kam don ka KSU ka jylla jong ngi kam long kumba ka long mynta, bun ka jingshah khñiot ka jingshah bam duh ki jaka puta bad ka jingshah lehbeiñ ki rit ki ria, hynrei kum ki nongshong iew khamtam ki rit ki ria ki heh mynsiem namar ka jingdon ka KSU.
Ha kawei ka bynta kila pynpaw ka jingsngewkhia bad sngewdiaw halor ka jingshah kem ki nongïalam ka KSU ha kaba kawei naki longkmie kala buh jingkylli ruh ba khapngiah haduh katno kata ka jail ha Shillong ba hap ban rah sha Garo ïaki nongïalam ka seng? Hato ka sorkar ka kwah ban leh kumba leh ïa u Bah Bull Lyngdoh haduh ba un da khrew ka met bad ka bor jabieng? Bad kum ki rit ki ria hi ki ai ka jingkyrshan ïaka seng KSU haduh ba ki mat dawa kin urlong, la bynrap ki nongshong iew.