Buh da ka drop point ïa ki kali nabar ba ki kali Meghalaya kin ïoh ban ïalam ïa ki nongjngohkai pyrthei: KHNAM

Shillong, Nailar 24: Katba ka jingïakren halor ki issue jong ki kali tourist ki bym dei kiba register bad ka Meghalaya ka dang ïaid shakhmat, ka la dei por ban shim noh ïa ki rai ban khanglad noh ïa ki kali kiba nabar ka jylla, ban leit ban kamai sha ki jaka jngohkai pyrthei.
Katkum ka kyrwoh ba la phah da u Working President ka seng Khun Hynñiewtrep National Awakening Movement (KHNAM) u Bah Thomas Passah la ong ba ka seng halor kane naduh u snem 2017 ka la thoh sha ka sorkar jylla, ha kaba na ka liang ka sorkar jylla ruh ka la bthah ruh ïa u Commissioner Transport/Under Secretary Tourism Department, lyngba ka shithi No. TPT.73/2011/7 tarik 10 Kyllalyngkot 2018 ban wad ïa ki jingtip ba bniah na ka Sorkar Assam bad Sikkim.
“Hadien ba ka sorkar ka la dep ban ïoh jingtip, ka tnat transport ka la bthah ruh ïa ki District Transport Officer ban khanglad ïa ki kali ki bym dei registration jong ka Meghalaya kiba leit sha ki jaka jngohkai pyrthei. Hynrei kaba sngewsih ka long ba hadien ba wan pat ka synshar jong ka MDA-1, ïa kane ka kam khlem buddien shuh bad ka la shu jah la ka jah. Ka seng sa shisien ka dawa ba ha kane ka kynti ka sorkar ka la dei ban leh noh ïa kaba donkam bad ban buh noh da ka drop point ïa ki kali ba nabar bad ki kali kiba dei na Meghalaya pat kin ïoh ban ïalam ïa ki sha ki jaka jngohkai pyrthei. Kane kan ïarap bad kan pynthikna ruh ba ki trai jylla kin ïoh kamai na ka kam jngohkai pyrthei bad ha kajuh ka por kan ïarap bad pynsuk ruh ïa ki nongwan jngohkai pyrthei ha kaba bun ki liang,” ong u Bah Thomas Passah, Working President ka KHNAM CEC ha ka kyrwoh khubor.