Shillong, Nailar 24 : Ka Khasi Students’ Union (KSU) kan shim rai lashai ka 25 tarik halor ka jingkhot ïakren jongka sorkar ha ka Central Executive Committee (CEC) ba ka la khot kyrkieh ban long lashai ka sngi ïathuh u Assistant General Secretary ka KSU u samla Pynshaiborlang Rani.
Ka sorkar kala khot ïa ka KSU sha ka miej jingïakren ban atai halor ki san tylli ki mat jingdawa jongka Seng hadien ba la mih ki kynrum kynram bad jingbym shongshngaiñ hapoh ka jylla.
U Myntri Rangbah u la ïathuh mynta ka sngi ba ka Sorkar ka kloi ban ïakren bad ka KSU.
U Samla Rani u la ïathuh ba ka seng ka ïohi ïa ka jingkhot ïakren ka sorkar ha ka step Lah Sngi U Blei lyngba ki lad pathai khubor hynrei ka la ïoh pdiang ruh da ka shithi na ka sorkar ha ka por hapdeng ka 11 bad 12 baje mynsngi.
Kumta u la ong ban lum mar mar ïa ka CEC mynta ka Lah Sngi U Blei kam lah ban long na kata ka daw la khot noh lashai ka sngi namar ki nongialam na kylleng ki District ruh kin wan ban iashim bynta.
“ Ka long kaba eh ban khot mar mar ïa ka CEC namar ka seng ka don ki nongïalam na kylleng ki District Khasi bad Jaintia na kata ka daw ngi la khot kyrkieh noh lashai ka sngi” ong u samla Rani.
Mynta ka sngi ka KSU ka la pynher lama bad pynlong jingduwai kyrpang ha ophis ka seng ha Jaiaw ha ka jingïadon lang ki nongalam ba rim jongka.
