Shillong, Nailar 24 : U Myntri Rangbah ka Jylla U Conrad K Sangma ha ka Lah Sngi U Blei ula ïathuh ba ka Sorkar ka la thoh shithi sha ka Khasi Students Union (KSU) ban khot ïa ki ban wan sha ka miej jingïakren halor ki 5 tylli ki mat jingdawa jong ka.
“Ngi la thoh shithi sha ka KSU bad kyntu ïa ki ba kin wan sha ka jingïakren. Ngi khmih lynti ba ngin sa ïoh ïa ka jubab lehse mynta ka janmiet ne lashai ka sngi bad ngin sa ïakren ïa baroh san tylli ki mat jingdawa jong ka” ong u Conrad haba ïakren bad ki nongthoh khubor.
Halor ka jingkynnoh ba ka Sorkar ka khlem leh ei ei halor ki jingdawa ka KSU, u CM ula ong “Ai ba ngan kular ha phi ba kane kam long kumta bad ha kiba bun ki bynta, ha ka jingshisha, ki kam ki la ïaid. Ka la don ka jingpynsngewthuh bakla bad kat kiba don ki mat kiba mih, ngin sa pynshai ha ka jingïalang ba ngin sa ïashong bad ki dkhot ka KSU”.
“Kumta, kat kaba donkam ki jingpynshai ngin sa ai ha ki hynrei na ka liang jong ngi, kumba nga ong, ha jan baroh ki bynta, la ka dei kane ka seng lane kiwei ki seng kiba la wan shakhmat, ka Sorkar ka la shim khia bha ban leh ei ei ïa kiba bun ki jingdawa jong ki bad ngi la kren shai ruh ïa kiei kiba lah ban leh bad ki bym lah ban leh. Kat kaba ngi lah ban leh, ngi ai ïa ka jingkular bad ngi pynïaid shakhmat ïa ka kam. Ka la don ka jingbym biang ha ka jingaiktien. Ngin pynthikna ba ngin don ïa ka jingïalang bad ngin sa pynshai ïa baroh kito ki mat” ula bynrap.
Haba kylli la ka KSU kan pdiang ïa ka jingkyrpad ka Sorkar, u Conrad ula ong “Ka shithi lehse ka la leit mynta hynrei ngin sa tip kham hadien ha ka por janmiet lane mynmiet”.
Halor ka jingdawa ban pyllait ïa ki Nongïalam ka KSU bad ban weng ïa ka MMPO/MPDA pyrshah ïa ki, u Myntri Rangbah ula ong ba ka aiñ kan ïaid la ka jong ka lynti.
“Ka aiñ ka don halor ka nongrim bad kaei kaba jia, ka aiñ kan shim la ka jong ka lynti bad kumta kam bha ïa nga lane ïano ïano ruh ban shu wan bad ong ba ki rule bad ki aiñ kin kylla tang namar ka dei kawei ka Sengbhalang lane kawei pat lane ki riew shimet. Nga sngew ba kane kam ïahap ha ka synshar khadar. Kumta, sngewbha shah ïa ka aiñ ba kan shim la ka jong ka lynti bad nga sngew ba kam bha ïa ngi ban tuklar” ula ong.
Halor ka jingïaid ka jingtohkit ïa ki kam thombor ha ka 19 tarik Nailar, u Conrad ula ong “Ngam don ïa ka jingtip bad nga ïa mynta. Ngan sa shong bishar ïa ka jinglong jingman mynta ka sngi hynrei kumba nga ong, ngi la ithuh ïa san ngut ki riew tap khmat bad ki Pulit ki la shim ïa ka sienjam ban leh ei ei bad kin ïai bteng ha ka ban pynthikna ba baroh ki runar kiba donkti bad lam sha kane ka jinglong jingman ka suk ka saiñ, kin sa shah kem bad ïoh ïa ka jingpynsaja ba dei hok kat kum ka ain”.
Haba kylli la ka Sorkar kan wanrah noh da ki SOP na ka bynta ka jingpynlong ïa ki rally bad ïaid paidbah, u Conrad ula ong ba ha ka jingshisha ki kyndon ba dei ban leh bad bym dei ban leh ki la don haba ai ïa ki jingbit.
“Mynta kaei kaba ngi hap leh ka long ban nang pynbun ïa ki kyndon jong kiei kiba lah ban leh bad ki bym lah bad ngin sa bynrap ïa ki. Ngin pynthikna ruh ha ka ban pynjari ïa ki kyndon ba kham tyngeh bad kumba nga ong, ki kyndon kin ïaid beit ha ka por ba ai ïa ki jingbit” ula ong.
Haba kyntait ia ka jingpulom ki bor syntiat ban tehlakam ïa ka rally thuk thuk, u Myntri Rangbah ula ong “Kam don satia ka jingpulom. Lada kren hok, ki bor khmih ki la khmih lut ïa kiei kiei baroh, ngi treikam ruh da ka jingpyrkhat ha ka nongrim ka jingshaniah bad ka jingkular bad ngi jam shakhmat bad kane ka jingshaniah bad jingkular”.
U iathuh ba ki bor district ki la buh ïa ki pulit ha ki jaka ba ïaid ka rally hynrei ban khmih bniah ïa ki ka long kaba eh namar ka jingheh ka rally bad ka jingsaphriang jong ki jingjia na kawei ka jaka sha kawei pat.
U Myntri Rangbah ula bynrap ba ka jingleh jong ki runar ka long kaba palat pud bad ka la pynkyndit wat ïa ki paidbah.
