Plie paidbah u Sarbananda Sonowal ïa ki Project ba 427.80 klur ha ka Kad lieng Paradip bad ka lad ban ring um haduh 18.5 m

Paradip, (Odisha), Nailar 22 : U Myntri ka tnad Ports, Shipping and Waterways (MoPSW), Sarbananda Sonowal, u la plie paidbah ïa ki hynniew tylli ki projek kiba kongsan ba ïadei bad ki jingdon jingem kiba shongdor T.427.80 klur tyngka ha Paradip Port Authority (PPA), kaba pyni ïa ka jingdap jong ka kad lieng kaba 18.5 metre bad u mawmer jong ka jingthung shi-million tylli ki dieng, katba u la sakhi ruh ïa ka jingsoi ïa ki jingïateh kular ai jingbit na ka bynta lai tylli ki projek ba pyntreikam da ki mashin kiba shongdor T.1,580.36 klur kaba thmu ban pynkhlain shuh shuh ïa ka bor treikam, ka jingtreikam bad ka jinglah ban kit mar ka Paradip.
Ki projek ki kynthup ïa ka jingpynïaid lieng, ka jingpynïasoh, ka jingshngain, ka jingpynneh pynsah, ki jingdon jingem ba ïadei bad ki jaka sah bad ka jingkyntiew ïa ka imlang sahlang, katba ki projek pyndonkam da ki mashin ki thmu ban kyntiew ïa ka jingpynïaid ïa ki mar bad ban pynduna ïa ka por ba ki lieng ki donkam ban treikam.
La synranlang ïa u Myntri ka Sorkar Pdeng da u Myntri ka sorkar Odisha (Independent Charge), ka tnad Industries, Skill Development and Technical Education, u Sampad Chandra Swain; u MP ka Jagatsinghpur u Bibhu Prasad Tarai; U chairman ka Paradip Port Authority u P. L. Haranadh, IRTS; U Deputy Chairman u T. Venu Gopal; ki heh ophisar, ki nongshim bynta bad ki dkhot jong ka imlang sahlang ha ka Paradip Port.
U Myntri Sorkar Pdeng u Sarbananda Sonowal u la ong ba ki jingbei tyngka kin pynkhlain ïa ka kyrdan jong ka Paradip kum ka khyrdop ba kongsan jong ka kam duriaw bad kan wanrah ïa ki lad kamai kiba kham heh ha kylleng ka thain mihngi.
“Ka jingpynheh ïa ka bor treikam jong ka kad lieng Paradip kam dei tang ban pynkhlain ïa kawei ka kad lieng; ka dei ban wanrah ïa ka jingkiew kaba kham bun na ka bynta ka thain mihngi jong ka ri India. Da ki jingpynkhreh kiba kham jylliew, ki jingdon jingem kiba katkum ka juk mynta ban pynkit ïa ki mar, ka jingkyntiew ïa ka jingpynïasoh bad ka jingpyndonkam ïa ki mashin kiba kham heh, ka Paradip ka don ha ka kyrdan kaba biang ban kyntiew ïa ka khaii pateng, ka jingkit mar, ki kam karkhana bad ka jingplie ki lad ïoh kam ha kylleng ka thain bad ban nohsynniang sha ka jingpaw ka India kum ka ïoh ka kot kaba lah ban ïakhun ha ka kam duriaw ha ka pyrthei,” ong u Sarbananda Sonowal.
Ki hynñiew tylli ki projek kiba shongdor T.427.80 KLUR. Ka projek ba T.427.80 klur ka kynthup ïa:
Ka jinglah ban rung um kaba 18.5 meter ka jingjylliew — T.352 klur: Ka jingkjit um kaba heh kan plie lad ïa ka kad lieng jong ka Paradip ban pynïaid ïa ki lieng Capesize kiba la kit pura ha ka kad lieng ba shapoh jong ka, kaba pynbha ïa ka jingpyndonkam ïa ki lieng bad ïarap ban pynduna ïa ka jingpynkylla ïa ki lieng bad ka jinglut jingsep ha ka jingpynpoi marbam
Atharbanki ka jingkieng thymmai kaba ar — T 24.89 klur: Ka jingkieng kaba 500-metre, kaba don lai lynti, bad ki lynti ïaid kjat bad ka jaka pynïaid pipe halor ka Atharbanki Creek, kan pynduna ïa ka jingkhapngiah ki kali ha kane ka lad bai aid jan 3000 tylli ki trok man ka sngi.
Sports Hostel — T 2.10 klur: Kane ka jaka kan pynbiang ïa ka jaka sah bad ki jingshakri ïa kito kiba kwah ban long nongïalehkai, kaba kyntiew ïa ka jingkiew shaphrang jong ki samla.
Ka jingpynbha ïa ka Administrative Office Building — T 12.18 klur: Ka jingpynbha ïa kane ka building kaba la don naduh ki snem 1980 bad ki jaka harud jong ka, ka dei kaba la pyntrei da ka NBCC (India) Ltd., bad kane ka jaka ka don ruh ïa ki jaka pynieng kali ba kham bha.
Ka jingpynbiang ïa ka Natural Gas da ki pipe sha ki jaka sah briew — T 20 klur: La pynwandur ha ka jingïatreilang bad ka Bharat Petroleum Corp. Ltd., bad ka bynta kaba nyngkong kan pynpoi PNG sha 546 tylli ki jaka sah briew ha Madhuban. La khmih lynti ba kane ka jaka kan pynduna ïa ka jinglut jong ki iing ha ka gas haduh 40% bad pynlong ïa ka Paradip kum ka kad lieng kaba heh kaba nyngkong eh ban ai ïa ka PNG sha ka shnong sah jong ka.
Ka rukom pynïaid lieng bad ai jingtip ïa ka jingleit jingwan jong ki lieng kaba kham tbit — T15.50 klur: La pynwandur ryngkat bad ka National Technology Centre for Ports, Waterways and Coasts at IIT Madras ha IIT Madras, kane ka lad treikam ka pynïasoh lang ïa ki radar ba skhem, ka jingstad thymmai, ka AIS, ka CCTV, ka jingpeit bniah ïa ka jingïaid jong ki lieng haduh ka 3D visualisation ban peit ïa ka jingïaid jong ki lieng haduh 20 nautical mile na ka ATC-style signal steshon kaba katkum ka juk mynta.
U dieng uba dap shi million: U Sonowal u la thung ïa u dieng ba dap shi million ha Paradip Port, kaba long u mawmer ha ka kam thung dieng bad ki sienjam na ka bynta ka mariang ha kane ka kad lieng.
U mawmer ha ki kam na ka bynta ka mariang u dei uba tei halor ki sienjam thung jingthung ba la sdang hadien ka eriong bah jong u snem 1999, ha kaba ka Bor synshar ka la pynjur ïa ki kam thung jingthung ha kine ki saw snem ba la dep. Ka PPA ka la ong ba la thung haduh shi lak tylli ki dieng man la u snem ha kane ka por, ha kaba ki nongtrei, ki nongshim bynta bad ki nongshong shnong ki la nohsynniang sha kane ka sienjam. Ka kad lieng ka la ong ba kane ka sienjam ka long ban pynïar ïa ka jingjyrngam, ban kyrshan ïa ki jingthaw ba im bad ban pynkhlain ïa ka jingpynneh pynsah ïa ka mariang.
T.1,580.36 KLUR KI PROJEK BAN PYNDONKAM DA KI KOR : Ka PPA ka la soi ruh ïa ki jingïateh kular na ka bynta lai tylli ki projek, da ka jingbei tyngka kaba T1,580.36 klur, kum shi bynta jong ka sienjam jong ka ban pynurlong ïa ka jingpyndonkam da ki kor ha ki jaka shong jaka sah haduh 100% ha u snem 2030, haba ïanujor bad ka jingling jingman kaba mynta kaba long 80%. Kin kyrshan ïa ka jingpynïaid ïa ki mar kiba kham stet, kiba shngain bad kiba khuid katba ki pynduna ïa ka por ba ki lieng ban treikam bad ka jinglut jingsep ha ka jingpynpoi mar.
Kitei ki jingïateh ki kynthup ïa ka 5 MTPA South Quay mechanisation project, kaba la ai sha ka M/s Yogayatan Paradip SQB Terminal Pvt. Ltd. ha ka jingbei tyngka ba la antad haduh T 498.69 klur ha ka rukom treikam Build-Operate-Transfer (BOT); ka 8 MTPA Multipurpose Berth project mechanization project, ba la ai sha ka M/s Kalinga Bulk Terminal Paradip Pvt. Ltd. ha ka dor kaba T 630.67 klur, ruh ha ka rukom treikam BOT; bad ka 10 MTPA captive CQ-III mechanisation project, kaba la ai sha ka M/s AMNS Paradip Logistics Pvt. Ltd. ha ka jinglut kaba T451 klur.
U myntri ka sorkar pdeng u Sarbananda Sonowal u la ong ba ka jingkyntiew ïa ka Paradip ka dei shi bynta jong ka jingkylla kaba kham heh kaba dang ïaid ha ka kam duriaw jong ka ri India. “Hapoh ka jingïalam ba shlur jong u Myntri Rangbahduh ka Ri, U Narendra Modi ji, ka India ka la sdang ïa ka bynta kaba khlem pat ju jia mynno mynno ruh ha ka jingpynthymmai ïa ki kam duriaw. Ha kine ki 12 snem ba la dep, ngi la pynkhlaiñ ïa ki kad lieng, ki lynti lyngba ki jaka shong um, ki lieng bad ki bor jong ngi ha ka duriaw, kaba pynlong ïa kane ka bynta kum ka kor ba khlaiñ jong ka roi ka par bad na ka bynta ka Viksit Bharat 2047”, la ong u Sonowal.
KI SIENJAM CSR : Ka PPA ka la pyni ruh ïa ki jingmih na ki ar tylli ki sienjam na ka bynta ka jingkyntiew ïa ki sap treikam ba la bei tyngka da ka CSR ba la pyntreikam ha u snem 2025-26. Ka bor synshar ka la ai jingïarap pisa sha ka Centre of Excellence in Maritime and Shipbuilding (CEMS), Visakhapatnam, kaba hap hapoh ka Tnat Ports, Shipping and Waterway, na ka bynta ka jingai jinghikai kaba ïadei bad ka jaka trei jong ki 168 ngut ki samla bym don kam na Odisha ha Bhubaneswar. Ka jinghikai ka kynthup ïa ki kam kiba kynthup ïa u nongbuh jingtip shiphang ki mar, u nongkit mar bad u nongpynïaid ïa ka jingpynbiang mar, ha kaba ïa ki briew ba la shah hikai hadien la thung kam ha ki kompeni bapher bapher.
Ka PPA ka la kyrshan ruh ïa ka Marine Products Export Development Authority (MPEDA) hapoh ka tnad khaii pateng ha kaba pynlong ïa ki prokram kyntiew jingtbit na ka bynta ki nongtong dohkha ha Odisha, khamtam ha kylleng ka jaka tong dohkha ha Paradip. Ki prokram ki kynthup ïa ka jingbha jong ki dohkha bad ka jingpynïaid kam kaba khuid, ki rukom ri dohkha kiba don ka jingkitkhlieh, ka jingsam ïa ki jaka ri dohkha kiba don ki square-mesh bad ki painkhana, bad ka jingpynsngewthuh shaphang ki tiar ban kiar ïa ki dkar bad ka kam ri dohkha kiba lah ban ïaineh.
Ki sienjam ki thmu ban pynbha ïa ka jingkhuid jingsuba bad ka jingshngain ha ki kam tong dohkha katba ki kyrshan ïa ka jingri dohkha kaba lah ban ïaineh bad ki lad kamai bapher bapher na ka bynta ki nongtong bad nongri dohkha.