Jar jar dang shu peitkai shwa u Dr. Mukul Sangma ïa ka saiñ pyrthei ha ka ri bad ha jylla

Shillong, Nailar 22 : U Nongïalam ka Liang Pyrshah, u Dr. Mukul Sangma u la ong ba ïa mynta hi u dang peit kai jar jar shwa ïa ka jinglong jingman ha ka sain pyrthei ha ka ri khamtam hadien ba ka TMC ka la mad ïa ka jingphaloh kaba jur bha ha ka sainpyrthei ha ka ri baroh kaewi.
“Ki jinglong jingman ki kren hi ïa kaei kaba la paw pyrthei. Teng-teng ka long kaba donkam ban sngap jar shwa, ban trei jar-jar bad ban peit thuh ka long kumno. Tang hangta phi lah ban ïohi shai, hynrei ha ka por ba um ka khih, phim lah,” u Sangma u la ong haba kylli ïa ki jingthmu jong u ha ka lawei.
Haba kylli halor ka elekshon shiteng samoi bad kaei ka sienjam ba ka TMC kan shim, na ka liang u Dr. Mukul u la ong, “Lada phi ïohi ba ka don kano kano ka jingkhih ïa kano-kano ka kam, phin tip ba don u kyrtong. Hato phi ïohi ne em ïa kano-kano ka jingpyni kam?”
Shuh shuh nalor kata, u la ong ruh ba haman ki sengsain pyrthei ki ju sakhi ba ki don beit ki jingeh kiba lah ban jia bad don pat kiba ju jia khlem poi pyrkhat. “Hynrei ka jinglong jingman kaba mynta ka long kaba pher bad ka la ktah ïa ka TMC hadien ka elekshon MLA kaba dang shu dep shen.”
Haba batai ba ka TMC ka ïakynduh ïa ka lyer-langthari ha ka lynti jong ka, u Dr. Mukul Sangma u la ong ba kano-kano ka seng saiñpyrthei ka ju ïakynduh beit ïa ki jingeh ha ka jingïaid lynti jong ka. “Kawei pa kawei ka seng saiñpyrthei kan ïakynduh ïa ki jingeh. Kata ka long kaba ju jia. Teng-teng kiei-kiei ki jia ha ka rukom kaba ju long, bad teng-teng ki jia ruh ha ka rukom kaba ym don ba khmih lynti ba kan jia,” u la bynrap biang.
“Balei nga ong ba ka long kaba ym pat ju jia kumne ka long namar hadien ki elekshon jylla, phim pat ju ïohi ïa ki MP kiba phet seng. Hynrei mynta, sngewsih ban ong, kane ka la jia ha kane ka ri. Kane ka jingjia kadei kaba ym pat ju jia kumne,” u la ong.