Naduh ba wan ka Shree Cement shu mih ki kynrum kynram hapoh ka jylla khamtam ha EJHD: JNC

Khliehriat, Nailar 20: U President uba dei u nongialam jong ka Jaiñtia National Council, na East Jaiñtia Hills District, u bah Sambormi Lyngdoh, u pynrem jur ïa ka jingkem ki pulit ia ki nongialam ka Khasi Students Union bad ong ba ka dei ka jingkem kaba khlem don satia kano kano ka jingtohkit ha shwa ban kem, u la kynthoh jur ruh da kaba ong ba naduh ba wan ka company Shree Cement ka la wanrah bad pynmih bun ki kynrum kynram, bun ki huri hura hapoh ka jylla bad kumjuh ruh hapoh East Jaiñtia Hills District.
U President ka JNC u la ong “Ka seng ka pynrem jur ïa ka jingshah hiar thma ka ophis jong ka khasi Students Union kaba don ha Jaiaw bad ka jingshah kem jong ki nongïalam jong ka KSU ba kynthup naduh u President, u bah Raymond Kharjana, u vice president, u samla Pynkmen Sanmiet bad u General Secretary, u samla Reuben Najir mynnin ka miet, halor kato ka jingjia kaba la mih ha ka por ba pynlong ïa ka bike rally jong ka KSU, haba ngi pynrem ïa ka jingleh ki pulit ngi khlem pynksan ruh ïa kaei kaba la jia mynnin ka sngi bad ym lah ruh ban pdiang khamtam ha ka imlang sahlang ka jong ngi na kato ka jingmih kulmar ha ka rally, kum ki sengbhalang haba ngi pynlong ïa kano kano ka jingiakhih ka dei ban long kaba jai jai, hynrei ka jingmih jong ki jingkulmar kala wanrah ruh iaka jingiapher hapdeng ki ar jylla ka Assam bad Meghalaya. Hynrei kum ka seng ngim don ban ong eiei halor kane. Hynrei kaba pynlyngngoh ïa ngi kum ka seng ka long ba kumno la kem ïa ki nongialam ka KSU khlem kano kano ka jingtohkit, shibun ki jingiakhih la iakhih, shibun ruh ki jingkulmar ba la mih hangne hangtai hynrei ngim juh iohi ba shah hiar thma ki ophis jong ki sengbhalang bad ban kem iaki nongïalam ba hakhlieh duh jong ki seng bad kane hi ka pynsuba jur ïa ngi kum ka JNC imat ka dei ba ka don kaei re kaei sha lyndet. Ha ka jingshisha hi haba ngi pynlong kano kano ka jingiakhih ka dei beit ban pynsngew ïa ka Sur jong ngi sha ka sorkar bad ngim kmen satia haba mih kano kano ka jingkulmar, ne ka jingbym shongsuk shongsaiñ, kaba nyngkong hi ka pynlyngngoh ïa ngi ba balei la kem khlem kano kano ka jingtohkit, bad kaba ar kadei ba naduh ba wan kane ka company Shree Cement hapoh ka jylla jong ngi khamtam ha East Jaiñtia kaba la wanrah ym tang ki huri hura hynrei lah pynpait ruh arliang ïaka Elaka Nongkhlieh, la wanrah ruh ka jingiapher hapdeng ka elaka Sutnga bad Nongkhlieh”
“Ngi la iohi ruh naduh kato ka public hearing ba la dep, kata naduh ka 30 bad 31 tarik ïa ka jingleh donbor ka sorkar lyngba ka tnat pulit, ngim lah ban kynnoh ïa ka tnat pulit watla ka leh ma ka, namar khatduh hi ngi sngewthuh ba ka tnat pulit ka dei tang ka tnat treikam jong ka sorkar bad ki pulit ruh kim nym nud ban leh ïa kano kano ka kam khlem da ioh bor na ki bor ba halor.Ngi la iohi ruh naduh kato ka 30 tarik ka jing shah kem ki nongialam ka Jaiñtia National Council bad ka jingkawang maw ruh ïa ki kali bad ki briew kiba mut ban leit sha ka public hearing. Shih shuh, ngi lah iohi ruh mynnin ïa ka jingkren u Secretary bad Doloi ka Elaka Nongkhlieh kiba la ong ba ngi la khot ïa baroh ki nongkyrshan bad ki nongpyrshah sha ka public hearing, ka jingkylli kaba ngi kwah ban buh mynta ka long ba mano kine kiba lah ban khot briew? Hato dei ma ki mo ???, hato ka elaka kaba pynlong ïa ka public hearing ka dei ban khot ïa ki briew??? Haba ngi puson bha ïa ka jingkren u Secretary bad Doloi ka Elaka Nongkhlieh imat ka don aiu re aiu ka daw ba ki shlur ban kren haduh katne katne bad haba phai shaka jingshahkem jong ki nongialam ka KSU ruh imat ka don kaei re kaei ka bor kaba na sha lyndet, kane ka dei ka buit jong ka sorkar ban pyntroiñ ïa ka sur khnang ban pynjar jar ïa ka sur jong ki trai ri trai muluk bad haba phai ruh ïa ka jingjia mynnin ka sngi na kato ka jingkulmar kaba la mih ka don ka bynta kaba na sha lyndet bad ngi pyrkhat ruh ïa kato ka jingjia bad kim dei ki dkhot ka KSU kito kiba pynkulmar namar kumba ong mynne lada ym don kaei kaei sha lyndet balei ka sorkar ka hap ban kem beit direct ïa ki nongialam ???” la bynrap u President ka JNC.
“Haba phai ruh sha kane ka sorkar ka ba ialam da ka NPP ngi iohi ïa ka jingrhah spah ka jong ka, khamtam ïa u nongïalam ba ha khlieh duh jong ka party, u Conrad Sangma haduh katno u kwah ban kyntiew ïa ka party ka jong u bad ngi suba jur ruh ba kane ka Shree Cement imat kadei ka nong bei tyngka kaba heh bha ïa ka party bad dei na kane ka daw ba ka sorkar ka sa leh donbor lyngba ka tnat pulit ban pynduh pyndam ïa ka sur ki trai ri, ka khubor kaba shai ngi phah sha ka sorkar ba Kynmaw ïa phi la jied da ki paidbah bad ka por ka jong phi ka dei tang san snem bad kynmaw ruh ba ki paidbah kiba pynkiew bad ki paidbah kiba ban pynhiar”
“Shuh shuh, ka kyrwoh kaba shai ba phi lah ban kem ïa ngi bad pyntieng pynsmiej ïa ngi ,hynrei kynmaw ba phim lah pat ban pynduh ïa ka Mynsiem ialeh ka jong ngi, iayka Mynsiem ieid ri ka jong ngi kaba lah hiar pateng na ki khlawait ki jong ngi kum u Syiem Tirot Sing, u Woh kiang Nangbah bad kiwei. Ngi na ka Liang ka JNC ruh ha kane ka 23 tarik une u bnai yn kut ka jingai por ka seng jong ngi ïa ka sorkar bad ngin sa shong ia ka jingialang CEC ban ia pyrkhat bad ban shim ïa ki sienjam jingiakhih ba jai jai katkum ka aiñ halor kane ka bynta”
“Kyntang ïawai ka kyrwoh sha ka jaitbynriew hynñiewtrep ba phin ïa pyrkhat bad puson bha halor kane ka jingleh jong ka sorkar la phin long kita ki nongpeitkai ne phin long ki nongialeh ne ???” pynkut ka kyrwoh khubor na ka JNC.