Ka jingleh riewkhlaw ki pulit ka la pynshong syier ïa ki paidbah, khynnah bad kiba thiah pang ha Robert: FKJGP

Shillong, Nailar 20: Ka Federation of Khasi Jaiñtia and Garo People (FKJGP) Central Body ka dap da ka jingsngewkhia kaba khraw halor ki kynrum kynram kiba la mih hadien ka jing shim sting jong ka sorkar jylla ïa ki mat jingdawa ba buh da ka Khasi Students Union (KSU).
Katkum ka kyrwoh khubor na u President ka FKJGP u Bah Dundee Cliff Khongsit u la ong, Kum ka seng kaba don ïa ka jingkitkhlieh kam kwah satia ba ki kynrum kynram kin dang ïai bteng hynrei kala dei ka kamram jong ka sorkar ban pynbeit mardor ha shwa ba ka por kan dier, ha kajuh ka por na ka liang jong ka FKJGP ka pynrem jur ïaka jingleh riewkhlaw jong ki bor pulit ban khynra wat ha ka office treikam jong ka KSU da kaba pynjulor ruh ïaki tiar ki tar bad khamtam eh ba ki da pyndonkam tear gass bad kiwei kiwei ki tiar pynmynsaw la kumba leh ha ki por ba khynra ïa ki seng kieng atiar.
Katei ka jingleh riewkhlaw jong ki pulit ka la pynher syrngiew ruh ïa ki paidbah nong shnong shnong, ki khyllung khynnah bad wat ia ki nongpang kiba thiah pang ha Robert Hospital, ym tang katta ki bor pulit kila pynjulor ruh wat ïa ki ïing ki sem kiba don marjan bad ka Office treikam jong ka KSU.Kum kitei ki jingjia kidei ki ba ym lah satia ban pdiang da ka seng bad ka imlang ka sahlang hi baroh kawei bad na ka liang jong ka FKJGP ka kyntu ia ki bor sorkar ba ki dei ban teh lakam ym ban ai laitlan than ïaki bor pulit ban pyndonkam bakla ïa ka bor khnang ba kin ym mih satia ki jingjia kiba sngewsih, ong u Bah Dundee.
Shuh shuh u la ong, Hooid kum ka seng ka tip bad sngewthuh shai ba ki bor jong ka ain ki don la ka jong ka bynta ban leh ban ban pyndep ïala ka jong ka kamram hynrei dei pat ban leh da ka lynti kaba dei khnang ba kan ym long pynban da kaba theh da ka petrol ha ka ding kaba la sdang ban klang ioh kan ktah shuh shuh ïaka jing shongsuk shongsain.
Ha kajuh ka por na ka liang jong ka FKJGP ka kyntu ïa ka sorkar jylla ba kadei ban shim khia ruh mardor ïa ki kynrum kynram kiba la sdang ban ïalam bakla da mano re mano ïaki kynhun niah kali tourist na ka jylla Assam tang na i daw ibarit ïa kaba la pyrshang ban shim kabu da mano re mano ban pynsniewdur ïa ka jingiajan hapdeng ka jylla Meghalaya bad Assam kiba dei ki jylla kiba marjan.Ha kajuh ka por na ka liang jong ka FKJGP kum kawei na ki kynhun kaba don ha ka shatri jong ka North East Indigenous People Forum (NEIPF) kala dep ïakren ruh bad ki nongkitkam ba na ka jylla Assam kumno ban tehlakam bad ban bteng ruh ïa ki kam ki jam kumba ju long baroh shi katta khnang ba kan ym ktah satia ïa ki nongleit nongwan na baroh ar tylli ki jylla.
Kyntang ïawai ka FKJGP sa shisien pat ka kyntu ïa ki bor sorkar ba kam dei satia ban shu khein sting ïa kine ki jinglong jingman hynrei kadei ban wad ïa ki lad ki lynti katba ka por ka dang biang lym kumta ka sorkar hi kan hap ban shim ïa ka jingkitkhlieh lada mih shuh shuh kino kino ki kynrum kynram kiba ktah ïa ka shongsuk shongsain.